കാസർകോട്: ആശുപത്രിയിലും വെർച്വൽ ക്യൂ സംവിധാനം.കാസർകോട് ജനറൽ ആശുപത്രിയിലാണ് സംസ്ഥാനത്ത് ആദ്യമായി വെർച്വൽ ക്യൂ സംവിധാനം ഏർപ്പെടുത്തുന്നത്.വീട്ടിലിരുന്ന് ടോക്കൺ എടുത്തശേഷം നിശ്ചിത സമയത്ത് ആശുപത്രിയിൽ എത്തി ഡോക്ടറെ കണ്ട് മടങ്ങാം.ജി.എച്ച് .ക്യൂ എന്ന പേരിലുള്ള മൊബൈൽ ആപ്പിലൂടെയാണ് ടോക്കണെടുക്കേണ്ടത്.രാവിലെ ആറ് മുതൽ എട്ട് വരെ ടോക്കൺ ബുക്ക് ചെയ്യാം. ഇംഗ്ലീഷ്, മലയാളം, കന്നട ഭാഷകളിൽ ആപ്പ് ഉപയോഗിക്കാം. ഏത് വിഭാഗത്തിലെ ഡോക്ടറെ കാണണമെന്ന് തെരഞ്ഞെടുക്കാനും ഇതിൽ സംവിധാനമുണ്ട്. ബുക്ക് ചെയ്തുകഴിയുന്നതോടെ ടോക്കൺ നമ്പർ സഹിതം എപ്പോൾ വരണമെന്ന അറിയിപ്പ് ലഭിക്കും. ഈ സമയത്ത് ആശുപത്രിയിൽ എത്തിയാൽ മതിയാകും.

ആദ്യഘട്ടത്തിൽ അൻപത് ശതമാനം ഒ.പി ടോക്കണുകളാണ് മൊബൈൽ ആപ്പിലൂടെ നൽകുന്നത്. ഓൺലൈനായി ടോക്കൺ ബുക്ക് ചെയ്യാൻ കഴിയാത്തവർക്ക് സാധാരണ രീതിയിൽ ആശുപത്രിയിലെത്തി ടോക്കൺ എടുക്കാം. സമൂഹിക അകലം ഉറപ്പാക്കി പരമാവധി ആൾക്കൂട്ടം ഒഴിവാക്കുകയാണ് പദ്ധതിയുടെ ലക്ഷ്യം.