പോത്തൻകോട്: മാതൃകാസുരക്ഷാറോഡ് പദ്ധതിയുടെ ഭാഗമായി പോത്തൻകോട് ജംഗ്‌ഷനിലെ പുതിയ ഗതാഗത സൗകര്യങ്ങൾ പരിഗണിച്ച് പാർക്കിംഗിനും ആട്ടോ, ടെമ്പോ സ്റ്റാൻഡുകൾക്കും ദൂരപരിധി നിർണയിച്ചുള്ള പുതിയ പരിഷ്‌കാരങ്ങൾ നാളെ മുതൽ നിലവിൽ വരും. പദ്ധതിയുടെ ഭാഗമായി ജംഗ്‌ഷനിലും സമീപ പ്രദേശങ്ങളിലുമുള്ള ഓടകൾ നവീകരിച്ച് നടപ്പാതകൾ തറയോട് പാകിയൊരുക്കി റോഡിന്റെ വശങ്ങളിൽ കമ്പി വേലികൾ നിർമ്മിച്ചിരുന്നു. യാതൊരു നിയന്ത്രണങ്ങളുമില്ലാതെ പ്രധാന റോഡിന്റെ ഇരുഭാഗത്തും വാഹനങ്ങൾ പാർക്ക് ചെയ്യുന്നത് ഗതാഗത കുരുക്ക് സൃഷ്ടിച്ചിരുന്നു. തുടർന്നാണ് പുതിയ പരിഷ്‌കാരങ്ങൾ ഏർപ്പെടുത്താൻ തീരുമാനിച്ചത്. പരിഷ്‌കരണം നാളെ മുതൽ നിലവിൽ വരുമെന്ന് പോത്തൻകോട് സി.ഐ അറിയിച്ചു.
പോത്തൻകോട് -വെഞ്ഞാറമൂട് റോഡ്
------------------------------------------------------------------
പോത്തൻകോട് - വെഞ്ഞാറമൂട് റോഡിൽ വലത് ഭാഗത്ത് എസ്.ബി.ഐ എ.ടി.എം മുതൽ എച്ച്.കെ തിയേറ്റർ വരെ ഇരുചക്ര വാഹനങ്ങളും അതുകഴിഞ്ഞ് കാറുകൾ ഉൾപ്പെടെയുള്ള നാലുചക്ര വാഹനങ്ങളും പാർക്ക് ചെയ്യാം. വെഞ്ഞാറമൂട് റോഡിൽ ഇടതുഭാഗത്ത് ജംഗ്‌ഷൻ മുതൽ മാർക്കറ്റ് വരെ യാതൊരുവിധ വാഹനപാർക്കിംഗും അനുവദിക്കില്ല. മാർക്കറ്റ് കഴിഞ്ഞുള്ള സ്ഥലത്ത് യാത്രക്കാരെ കയറ്റാൻ മൂന്ന് ആട്ടോകൾക്ക് പാർക്കിംഗ് അനുവദിക്കും. അവിടെന്ന് സിറ്റി ബാർ വരെ പാർക്കിംഗ് പാടില്ല. സിറ്റിബാർ കഴിഞ്ഞ് രാജകുമാരി മാളിന്റെ വശത്താണ് ആട്ടോസ്റ്റാൻഡ്.
നെടുമങ്ങാട് -വെമ്പായം റോഡ്
-------------------------------------------------------
നെടുമങ്ങാട് - വെമ്പായം റോഡിന്റെ ഇടതുവശത്ത് പോത്തൻകോട് ജംഗ്‌ഷൻ മുതൽ നിസ്‌കാര പള്ളിവരെ കാറുകളും ടൂവീലറുകളും പാർക്ക് ചെയ്യാം. പള്ളിക്ക് മുന്നിൽ പാർക്കിംഗ് അനുവദിക്കില്ല. പള്ളി കഴിഞ്ഞുള്ള സ്ഥലത്താണ് ആട്ടോസ്റ്റാൻഡിന് അനുമതിയുള്ളത്. നെടുമങ്ങാട് - വെമ്പായം റോഡിന്റെ വലതുഭാഗത്ത് പൗഡിക്കോണം റോഡ് തിരിയുന്ന സ്ഥലംവരെ രണ്ട് ആട്ടോകൾ പാർക്ക് ചെയ്യാൻ അനുവദിക്കും. ഈ വശത്ത് മറ്റ് പാർക്കിംഗുകൾ അനുവദിക്കില്ല.
പോത്തൻകോട് - കാട്ടായിക്കോണം റോഡ്
---------------------------------------------------------------
ജംഗ്‌ഷനിൽ നിന്ന് കാട്ടായിക്കോണത്തെക്ക് പോകുന്ന റോഡിൽ ഇടതുവശത്ത് എം.ടി തിയേറ്റർ ഉൾപ്പെടുന്ന വശത്ത് പാർക്കിംഗ് അനുവദിക്കില്ല. വലതുവശത്ത് സജീർ സ്റ്റോർ വരെ കാറുകളും അതുകഴിഞ്ഞ് ടൂവീലറുകളും ആട്ടോകളും പാർക്ക് ചെയ്യാൻ അനുവദിക്കും.
പോത്തൻകോട് - മുരുക്കുംപുഴ റോഡ്
---------------------------------------------------------
പോത്തൻകോട് - മുരുക്കുംപുഴ റോഡിന്റെ ഇടതുവശത്ത് അശ്വതി സിൽക്ക്സ് വരെ ഒരു പാർക്കിംഗും അനുവദിക്കില്ല. അതുകഴിഞ്ഞ് ആട്ടോസ്റ്റാൻഡ്. ഈ റോഡിന്റെ വലതുഭാഗത്ത് ബസ് ടെർമിനൽ കഴിഞ്ഞ് യാത്രക്കാരെ കയറ്റാൻ രണ്ട് ആട്ടോകൾക്ക് പാർക്കിംഗ് അനുവദിക്കും. അതുകഴിഞ്ഞ് വിസ്‌മയ കളക്‌ഷൻസ് സ്ഥിതിചെയ്യുന്ന വശത്താണ് ടെമ്പോ സ്റ്റാൻഡിന് അനുമതിയുള്ളത്. അതുകഴിഞ്ഞുള്ള സ്ഥലത്ത് കാറുകൾക്കും ടൂ വീലറുകൾക്കും ആട്ടോകൾക്കും പാർക്കിംഗ് അനുവദിക്കും.
ക്യാപ്‌ഷൻ: പോത്തൻകോട്ടെ പുതിയ
ട്രാഫിക് പരിഷ്കരണത്തിന്റെ രൂപരേഖ