തിരുവനന്തപുരം: കേരള മോട്ടോർ തൊഴിലാളി ക്ഷേമനിധി ബോർഡിന്റെ ധനസഹായ വിതരണ ഓൺലൈൻ പോർട്ടലിന്റെ ഉദ്ഘാടനം തൊഴിലും നൈപുണ്യവും വകുപ്പു മന്ത്രി ടി.പി.രാമകൃഷ്ണൻ നിർവ്വഹിച്ചു. ക്ഷേമനിധിയിൽ അംഗങ്ങളായ ടേബിൾ-1 വിഭാഗത്തിൽപ്പെട്ട സ്റ്റേജ് ക്യാരേജ്, കോൺട്രാക്ട് ക്യാരേജ് ബസ് തൊഴിലാളികൾക്ക് 5000/- രൂപ വീതവും, ടേബിൾ- 2 വിഭാഗത്തിൽപ്പെട്ട ഗുഡ്‌സ് വെഹിക്കിൾ തൊഴിലാളികൾക്ക് 3500/- രൂപ വീതവും, ടേബിൾ 3 വിഭാഗത്തിൽപ്പെട്ട ടാക്‌സി കാർ, ഒമ്‌നി വാൻ തൊഴിലാളികൾക്ക് 2500/- രൂപ വീതവും ടേബിൾ-4 വിഭാഗത്തിൽപ്പെട്ട ആട്ടോറിക്ഷ, ട്രാക്ടർ തൊഴിലാളികൾക്ക് 2000/- രൂപ വീതവും കൊവിഡ്- 19 ധനസഹായമായി വിതരണം ചെയ്യാൻ സർക്കാർഉത്തരവ് നൽകിയിരുന്നു. ധനസഹായ വിതരണം സുഗമമാക്കുന്നതിനായി സി-ഡിറ്റിന്റെ കൊച്ചി യൂണിറ്റിന്റെ സാങ്കേതിക സഹായത്തോടെയാണ് ഓൺലൈൻ പോർട്ടൽ സജ്ജമാക്കിയത്. ഓൺലൈൻ പോർട്ടൽ മുഖേന പദ്ധതിയിൽ അംഗങ്ങളായ തൊഴിലാളികളുടെ ഡേറ്റാബേസ് തയ്യാറാക്കാനും കഴിയും.

സെക്രട്ടേറിയറ്റിൽ മന്ത്രിയുടെ ചേംബറിൽ നടന്ന ചടങ്ങിൽ ബോർഡ് ചെയർമാൻ എം.എസ്.സ്‌കറിയ, ചീഫ് എക്‌സിക്യൂട്ടീവ് ഓഫീസർ ടി.സജീവ്കുമാർ, സി-ഡിറ്റ് രജിസ്ട്രാർ ജയദേവ് ആനന്ദ്, എസ്‌.ഐ.ബി റീജിയണൽ മാനേജർ രഞ്ജിത് ആർ.നായർ എന്നിവർ സന്നിഹിതരായിരുന്നു.