തിരുവനന്തപുരം:13 വരെ സംസ്ഥാനത്തെ വിവിധയിടങ്ങളിൽ ശക്തമായ മഴയ്ക്ക് സാദ്ധ്യതയുണ്ടെന്ന് കാലാവസ്ഥാനിരീക്ഷണകേന്ദ്രം അറിയിച്ചു. മദ്ധ്യ-കിഴക്കൻ ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദമാണ് കാരണം. അടുത്ത 24 മണിക്കൂറുകളിൽ ന്യൂനമർദ്ദം ശക്തി പ്രാപിച്ച്‌ തീവ്രന്യൂനമർദ്ദമാകാൻ സാദ്ധ്യതയുണ്ട്. ഇത് വടക്ക് പടിഞ്ഞാറൻ ദിശയിലേക്കു നീങ്ങാനാണ് സാദ്ധ്യത.

കൊല്ലം, പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, മലപ്പുറം, കോഴിക്കോട്, വയനാട്, കാസർകോട് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്. കണ്ണൂർ, കാസർകോട്, വയനാട്, ഇടുക്കി ജില്ലകളിൽ 12 വരെ മഴ ശക്താമാകും. ഒറ്റപ്പെട്ടയിടങ്ങളിൽ 24 മണിക്കൂറിൽ 64.5 മി.മീ മുതൽ 115.5 മി.മീ വരെ മഴ ലഭിക്കും.

തെക്ക് -പടിഞ്ഞാറൻ അറബിക്കടലിലും അതിനോട് ചേർന്നുള്ള മദ്ധ്യ പടിഞ്ഞാറൻ അറബിക്കടലിലും മണിക്കൂറിൽ 45 മുതൽ 55 കി. മി വരെ വേഗതയിൽ ശക്തമായ കാറ്റിന് സാദ്ധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുത്. കേരളതീരത്ത് കടൽ പ്രക്ഷുബദ്ധമാകാൻ സാദ്ധ്യതയുണ്ട്.