ശ്രീനഗർ: ജമ്മു കാശ്‌മീരിലെ വിവിധ മേഖലകളിൽ പാക്കിസ്ഥാൻ വെടിനിർത്തൽ കരാർ ലംഘിച്ചു. കഴിഞ്ഞ ദിവസം രാത്രിയാണ് സംഭവം. പാക്കിസ്ഥാൻ നടത്തിയ വെടിവയ്പ്പിൽ ഒരു ഇന്ത്യൻ സൈനികൻ വീരമൃത്യു വരിച്ചതായി റിപ്പോർട്ടുകളുണ്ട്. കരസേനാ വൃത്തങ്ങളെ ഉദ്ധരിച്ച് വാർത്താ ഏജൻസിയാണ് ഇക്കാര്യം റിപ്പോർട്ട് ചെയ്തത്.
കഴിഞ്ഞ ദിവസം ഷോപ്പിയാനിൽ നടന്ന സൈനിക ഓപ്പറേഷനിൽ കൊല്ലപ്പെട്ട തീവ്രവാദികളിലൊരാൾ പാകിസ്ഥാൻ പൗരനാണെന്ന് റിപ്പോർട്ടുണ്ടായിരുന്നു. പാകിസ്ഥാന്റെ പ്രകോപനത്തിന് സുരക്ഷസേന ശക്തമായി മറുപടി നൽകിയതോടെ രാത്രി വൈകിയും അതിർത്തിയിൽ വെടിവയ്പ്പ് തുടരുന്നതായാണ് വിവരം.