തൃശൂർ: കൊവിഡ് വ്യാപനത്തിനിടെ തൃശൂരിൽ കടുത്ത നിയന്ത്രണം. സമ്പർക്കം വഴി രോഗം പടരുന്ന സാഹചര്യത്തിലാണ് ജില്ലാ ഭരണകൂടം നിയന്ത്രണങ്ങൾ ഏർപ്പെടുത്തുന്നത്. തൃശൂരിലെ പച്ചക്കറി മീൻ മാർക്കറ്റുകൾ അടച്ചു. ഇന്നും നാളെയുമായിരിക്കും അടച്ചിടൽ ഉണ്ടാവുക. അടച്ചിട്ട മാർക്കറ്റുകൾ അണുവിമുക്തമാക്കാൻ തുടങ്ങി.

അതേസമയം ആരോഗ്യ പ്രവർത്തകർക്ക് രോഗം സ്ഥിരീകരിച്ചതിനെ തുടർന്ന് അടച്ചിട്ടിരുന്ന വടക്കേക്കാട് ആരോഗ്യ കേന്ദ്രം വീണ്ടും തുറന്നു. ജീവനക്കാർ ഉൾപ്പെടെ 47 പേരുടെ സാമ്പിൾ ഫലം നെഗറ്റീവ് ആയതിനെ തുടർന്നാണിത്. വടക്കേക്കാട്, അടാട്ട് ,തൃക്കൂർ പഞ്ചായത്തുകളെ കണ്ടെയിൻമെന്റ് സോണിൽ നിന്ന് ഒഴിവാക്കി. ഇതോടെ ജില്ലയിലെ സോണുകളുടെ എണ്ണം 10 ആയി കുറഞ്ഞു. 146 കൊവിഡ് ബാധിതരാണ് തൃശൂർ ജില്ലയിലുള്ളത്. ഇതിൽ കഴിഞ്ഞ 43 ദിവസത്തിനിടെ 45 പേർക്കാണ് സമ്പർക്കം വഴി രോഗം സ്ഥിരീകരിച്ചത്. ഇതിൽ 24 പേർ ആരോഗ്യപ്രവർത്തകരാണ്.