ന്യൂഡൽഹി: കൊവിഡ് രോഗികളുമായി നേരിട്ട് ബന്ധപ്പെടുന്ന ആരോഗ്യപ്രവർത്തകർക്ക് ഒരാഴ്ച ക്വാറന്റീൻ ഏർപ്പെടുത്തണമെന്ന് സുപ്രീം കോടതി കേന്ദ്ര സർക്കാരിനോട് ആവശ്യപ്പെട്ടു. നാളെത്തന്നെ ഇതു സംബന്ധിച്ച ഉത്തരവ് ഇറക്കണമെന്നും സുപ്രീം കോടതി കേന്ദ്ര സർക്കാരിനോട് നിർദേശിച്ചു.

ആരോഗ്യപ്രവർത്തകർക്ക് ശമ്പളം ലഭിക്കുന്നു എന്ന് ഉറപ്പു വരുത്തണമെന്ന് നിർദേശിച്ച് സംസ്ഥാന ചീഫ് സെക്രട്ടറിമാർക്ക് കത്ത് അയച്ചിട്ടുണ്ടെന്ന് പറഞ്ഞ കേന്ദ്രസർക്കാർ വീഴ്ച വരുത്തുന്നവർക്കെതിരെ കർശന നടപടി ഉണ്ടാകുമെന്നും കോടതിയെ അറിയിച്ചു. നാലാഴ്‌ചക്ക് ശേഷം വീണ്ടും ഹർജി പരിഗണിക്കുമെന്ന് കോടതി വ്യക്തമാക്കി.

ആരോഗ്യപ്രവർത്തകർക്ക് ക്വാറന്റീൻ ഒരുക്കാനായി പഞ്ച നക്ഷത്ര ഹോട്ടലുകളിൽ വരെ സജ്ജീകരണങ്ങൾ ഏർപ്പെടുത്തിയിട്ടുണ്ടെന്ന് സോളിസിറ്റർ ജനറൽ കോടതിയെ അറിയിച്ചു. കൊവിഡ് പ്രതിരോധ പ്രവർത്തനങ്ങളിൽ ഏർപ്പെട്ടിരിക്കുന്ന ഡോക്‌ടർമാർ, നേഴ്‌സുമാർ എന്നിവർക്ക് ശമ്പളം കൃതമായി നൽകാത്ത സ്ഥാപനങ്ങൾക്കെതിരെ ദേശീയ ദുരന്ത നിവാരണ നിയമപ്രകാരം ക്രിമിനൽ നടപടി സ്വീകരിക്കുമെന്ന് കേന്ദ്ര സർക്കാർ കോടതിയിൽ വ്യക്തമാക്കി.