പാരീസ്: വിഖ്യാതമായ ഈഫൽ ടവർ അടുത്താഴ്ച തുറക്കും. രണ്ടാം ലോക മഹായുദ്ധത്തിന് ശേഷം ഇതാദ്യമായാണ് ഈഫൽ ടവർ ഇത്രയും നീണ്ട കാലയളവിൽ അടച്ചിട്ടിരിക്കുന്നത്. കൊറോണ വൈറസ് പടർന്നുപിടിച്ച സാഹചര്യത്തിൽ ഈഫൽ ടവർ ഉൾപ്പെടെ ഫ്രാൻസിലെ ഒട്ടുമിക്ക ചരിത്ര സ്മാരകങ്ങളും മ്യൂസിയങ്ങളും അടഞ്ഞു കിടക്കുകയായിരുന്നു. ഇപ്പോൾ വൈറസ് വ്യാപനം നിയന്ത്രണവിധേയമായതോടെ രാജ്യത്തെ ടൂറിസം മേഖല വീണ്ടും തുറന്നുകൊണ്ടിരിക്കുകയാണ്. അടുത്താഴ്ച തുറക്കുമെന്ന് അറിയിച്ചെങ്കിലും 1,063 അടി ഉയരത്തിൽ തലയെടുപ്പോടെ നില്ക്കുന്ന ഈഫൽ ടവറിലേക്ക് പഴയ പോലെ സഞ്ചാരികളെ പ്രവേശിപ്പിക്കില്ല.

ജൂൺ 25നാണ് ഈഫൽ ടവർ തുറക്കാൻ തീരുമാനിച്ചിരിക്കുന്നത്. ടവറിന്റെ മുകളിലേക്കുള്ള എലിവേറ്ററുകൾ പ്രവർത്തിക്കില്ല. ടവറിന്റെ ഒന്നും രണ്ടും നിലകളിൽ മാത്രമേ സന്ദർശകരെ അനുവദിക്കുകയുള്ളു. അതും വളരെ കുറച്ച് പേരെ വീതം. 11ന് വയസിന് മുകളിലുള്ളവർക്ക് മാസ്ക് നിർബന്ധമാണ്. എല്ലാ ദിവസവും ടവറും പരിസരവും ശുചീകരിക്കും. പതിവ് രീതിയിൽ നിന്നും വ്യത്യസ്തമായി എല്ലാ രണ്ട് മണിക്കൂർ കൂടുമ്പോഴും ക്ലീനിംഗ് ടീമുകളും ശുചീകരണം നടത്തും. ടവർ സന്ദർശനത്തിനായുള്ള ഓൺലൈൻ ബുക്കിംഗ് നാളെമുതൽ തുടങ്ങും. ഈഫൽ ടവർ തുറക്കുന്നതോടു കൂടി പാരീസ് നഗരം വീണ്ടും സജീവമാകുമെങ്കിലും കൊവിഡ് പ്രോട്ടോക്കോൾ നിലനില്ക്കും.