ന്യൂഡൽഹി: ലഡാക്കിലെ അതിർത്തി സംഘർഷത്തിന് പിന്നാലെ ചൈനയോടുള്ള പ്രതികരണ രീതിയിൽ മാറ്റം വരുത്താൻ ഇന്ത്യൻ സൈന്യം ആലോചിക്കുന്നതായി വിവിധ ദേശിയ മാദ്ധ്യമങ്ങൾ റിപ്പോർട്ട് ചെയ്യുന്നു. ഗൽവാൻ സംഘർഷത്തിന് പിന്നാലെ പ്രതികരണരീതിയിൽ മാറ്റം വരുത്താൻ സൈന്യം ആലോചിക്കുന്നതായി എൻ.ഡി.ടി.വിയാണ് ആദ്യം റിപ്പോർട്ട് ചെയ്‌തത്. സംഘർഷമുണ്ടായാൽ വെടിവയ്ക്കരുത് എന്നതുൾപ്പെടെയുള്ള പതിറ്റാണ്ടുകൾ പഴക്കമുള്ള പ്രതികരണരീതിയാണ് ഇന്ത്യൻ സൈന്യം ഇപ്പോഴും അതിർത്തിയിൽ പിന്തുടരുന്നത്.

തിങ്കളാഴ്ച രാത്രിയുണ്ടായ സംഘർഷത്തിൽ 20 ഇന്ത്യൻ സൈനികരാണ് വീരമൃത്യു വരിച്ചത്. സംഘർഷത്തിൽ ചൈനീസ് പക്ഷത്തിലും വൻ ആൾനാശം ഉണ്ടായിട്ടുണ്ട്. കൃത്യമായ കണക്കുൾ പുറത്തുവന്നിട്ടില്ലെങ്കിലും 45 ഓളം ചൈനീസ് സൈനികർ മരിക്കുകയോ ഗുരുതരമായി പരിക്കേൽക്കുകയോ ചെയ്തിട്ടുണ്ടെന്നാണ് സൂചന.