ദോഹ: കൊവിഡ് വ്യാപനത്തിനുശേഷം നടക്കുന്ന ഏറ്റവും വലിയ ലോക മേളയായിരിക്കും 2022ലെ ലോക കപ്പ് ഫുട്‌ബോൾ എന്ന് ഖത്തർ സുപ്രിം കമ്മിറ്റി ഫോർ ഡെലിവറി ആന്റ് ലഗസി സെക്രട്ടറി ജനറൽ ഹസൻ അൽ തവാദി പറഞ്ഞു. കൊവിഡ് കാലത്തിനുശേഷം ലോകത്തെ ഒരുമിപ്പിക്കുന്ന മേളയായിരിക്കും 2022 ലോക കപ്പ്. മേളയിൽ വെല്ലുവിളികൾ ഉണ്ടാവുമെന്ന കാര്യത്തിൽ സംശയമില്ല. അതേസമയം, ലോകത്തെ ഫുട്‌ബോൾ എന്ന ഒരേ വികാരത്തിൽ ഒരുമിപ്പിക്കാനുള്ള അവസരം കൂടിയാവും.

മഹാമാരിക്കിടയിലും പുതിയ സ്റ്റേഡിയം പൂർത്തിയാക്കാനായത് നമ്മുടെ പദ്ധതികൾ മുൻനിശ്ചയ പ്രകാരം മുന്നോട്ടു പോകുന്നതിന്റെ തെളിവാണ്. ഖലീഫ ഇന്റർനാഷണലിനും അൽ ജുനൂബിനും ശേഷം മൂന്നാമത്തെ ലോക കപ്പ് വേദിയാണ് എഡ്യൂക്കേഷൻ സിറ്റി സ്റ്റേഡിയം. രണ്ട് സ്റ്റേഡിയങ്ങൾ കൂടി ഈ വർഷം അവസാനത്തോടെ ഉദ്ഘാടനം ചെയ്യുമെന്നും അൽ തവാദി പറഞ്ഞു. സീറ്റുകൾ ഗ്രൗണ്ടിനോട് ഏറ്റവും അടുത്ത് സജ്ജീകരിച്ചിരിക്കുന്നതിനാൽ 40,000 പേർക്ക് ഇരിക്കാവുന്ന പുതിയ സ്റ്റേഡിയം കാണികൾക്ക് ആവേശം പകരുന്ന അനുഭവമായിരിക്കും.