തിരുവനന്തപുരം: ജയിലുകളിൽ സസ്യേതര ഭക്ഷണം ഒഴിവാക്കി ഭക്ഷണച്ചെലവ് കുറയ്ക്കണമെന്നും സസ്യേതര ഭക്ഷണം വേണ്ട തടവുകാരോട് അതിന് പ്രത്യേകം പണം ഈടാക്കണമെന്നും സർക്കാർ ചെലവ് കുറയ്ക്കാനുള്ള വിദഗ്ദ്ധ സമിതി നിർദ്ദേശിച്ചു. ​ പോഷകാംശങ്ങളടങ്ങിയ സസ്യഭക്ഷണം നൽകണമെന്നും ജയിലിലെ തടവുകാർക്ക് നൽകുന്ന കൂലി കുറയ്ക്കണമെന്നും സമിതിയുടെ പ്രാഥമിക റിപ്പോർട്ടിൽ പറയുന്നു.

മറ്ര് പ്രധാന നിർദ്ദേശങ്ങൾ

 ഇ-ഓഫീസ് നടപ്പിലാക്കുകവഴി അധികം വരുന്ന ജീവനക്കാരെ തദ്ദേശ സ്വയംഭരണ സ്ഥാപനങ്ങളിലേക്ക് മാറ്രണം.

സെക്രട്ടേറിയറ്രിൽ അറ്റൻഡർ(554)​,​ കമ്പ്യൂട്ടർ അസിസ്റ്രന്റ്( 204)​,​ പ്രിന്റിംഗ് വകുപ്പ് ( 90)​,​ കെ.പി.ബി.എസ്(113),​​ സ്റ്രേഷണറി ഡിപ്പാർട്ട്മെന്റ് (52)​ എന്നിങ്ങനെയാണ് തസ്തികകൾ ആവശ്യമില്ലാതെ വരിക. മറ്റുവകുപ്പുകളിലും ഇതേപോലെ അധിക തസ്തികകൾ വരും. അവരെയും മാറ്റി നിയോഗിക്കണം.

ക്ഷേമനിധി ബോർ‌ഡുകളെ ലയിപ്പിച്ച് സംസ്ഥാന ജനറൽ വെൽഫെയർ ഫണ്ട് ബോർഡ് രൂപീകരിക്കുക. നിലവിലുള്ള ബോർഡുകളുടെ പ്രതിനിധികളെ പുതിയ ബോ‌ർഡിൽ അംഗങ്ങളാക്കുക. സമാന സ്വഭാവമുള്ള പൊതുമേഖലാ സ്ഥാപനങ്ങളെയും കോർപറേഷനുകളെയും ലയിപ്പിക്കുക.

കമ്മിഷൻ ഒഫ് എൻക്വയറി ആക്ട് പ്രകാരം പ്രവർത്തിക്കുന്ന നോൺ സ്റ്രാറ്റ്യൂട്ടറി കമ്മിഷനുകൾക്ക് കാലാവധി നീട്ടി നൽകാതിരിക്കുക. കമ്മിഷനുകൾ പ്രവർത്തനത്തിന്റെ നാൾവഴിയും ചെലവും വെബ് സൈറ്രിൽ പ്രസിദ്ധീകരിക്കുക. ആറുമാസം ചെലവാക്കിയ തുകയ്ക്ക് സമാനമായ തുക ഡെപ്പോസിറ്രില്ലെങ്കിൽ കമ്മിഷനുകൾക്ക് ആറുമാസത്തിലധികം കാലാവധി നൽകരുത്.

പൊലീസ്,​ എക്സൈസ്,​ റവന്യൂ,​ ഫോറസ്റ്ര്,​ ഫയർ ഫോഴ്സ് തുടങ്ങിയ എൻഫോഴ്സ്‌മെന്റ് വകുപ്പുകൾക്കൊഴികെ പുതിയ വാഹനങ്ങൾ അനുവദിക്കരുത്. മറ്ര് വകുപ്പുകൾ വാഹനങ്ങൾ വാടകയ്ക്കെടുക്കണം. പരമാവധി ഇലക്ട്രിക് വാഹനങ്ങൾ പരിഗണിക്കുക.

പുതിയ തസ്തിക സൃഷ്ടിക്കൽ,​ തസ്തികകൾ ഉയർത്തൽ,​ പുതിയ നിർമ്മാണ പ്രവർത്തനങ്ങൾ,​ ഫർണിച്ചറുകൾ വാങ്ങൽ തുടങ്ങിയവ ഒരു വർഷത്തേക്ക് നിറുത്തിവയ്ക്കുക.

പദ്ധതി,​ പദ്ധതിയേതര ചെലവുകളിൽ നിന്ന് ശില്പശാലകൾ,​ വിദേശയാത്രകൾ,​ ബ്രോഷർ പ്രിന്റിംഗ്,​ പുതിയ ഡിവിഷനുകൾ ആരംഭിക്കൽ എന്നിവ ചെയ്യരുത്.

 സ്കൂളുകളിലെ തസ്തികകൾ നിർണയിക്കുമ്പോൾ മൂന്നു വർഷം താത്കാലിക തസ്തിക പൂർത്തിയാക്കിവയെ മാത്രം സ്ഥിരം തസ്തികയാക്കുക.