ചടയമംഗലം: മദ്യലഹരിയിൽ വീട്ടിലെത്തി ഭാര്യയെ കൊടുവാളിന് വെട്ടിക്കൊലപ്പെടുത്താൻ ശ്രമിച്ച ഭർത്താവ് അറസ്റ്റിൽ. ചടയമംഗലം വെട്ടിക്കാവ് അഞ്ജനാ ഭവനിൽ കുട്ടപ്പനെയാണ് (51) ഭാര്യ അംബികയെ വെട്ടി പരിക്കേൽപ്പിച്ചതിന് ചടയമംഗലം പൊലീസ് അറസ്റ്റ് ചെയ്തത്. പതിവായി മദ്യപിക്കുന്ന കുട്ടപ്പൻ കഴിഞ്ഞ ദിവസവും വീട്ടിൽ മദ്യലഹരിയിലെത്തി ഭാര്യയുമായി വഴക്കുണ്ടാക്കി. തുടർന്ന് അടുക്കളയിൽ നിന്ന് കൊടുവാളുമായെത്തി വീട്ടുമുറ്റത്തുവച്ച് അംബികയുടെ തലയ്ക്കും കൈയ്ക്കും വെട്ടുകയായിരുന്നുവെന്ന് പൊലീസ് പറഞ്ഞു. സാരമായി പരിക്കേറ്റ അംബികയെ ബന്ധുക്കളും അയൽവാസികളും ചേർന്ന് ആശുപത്രിയിൽ പ്രവേശിപ്പിച്ചു. ചടയമംഗലം എസ്.ഐ ശരത്‌ലാൽ, എ.എസ്.ഐമാരായ സുധാകരൻ, അനിൽ, സലിം എന്നിവരടങ്ങിയ സംഘമാണ് അറസ്റ്റ് ചെയ്തത്.