ശ്രീനഗർ: ജമ്മുകാശ്മീരിൽ നടന്ന ഏറ്റുമുട്ടലിൽ സുരക്ഷ സേന ഒരു തീവ്രവാദിയെ വധിച്ചു. അവന്തിപൊരയിലെ മീജ് പാൻപോറിൽ ഇന്നലെ രാത്രിയാണ് ഏറ്റുമുട്ടൽ നടന്നത്. പ്രദേശത്തെ വീട്ടിൽ തീവ്രവാദികൾ ഒളിച്ചിരിക്കുന്നതായി രഹസ്യ വിവരം കിട്ടിയതിനെ തുടർന്ന് പൊലീസും കരസേനയും സംയുക്തമായി തിരച്ചിൽ നടത്തുകയായിരുന്നു.

സംയുക്തമായി നടന്ന തിരച്ചിലിനിടെ തീവ്രവാദികൾ സുരക്ഷസേനയ്ക്ക് നേരെ വെടിയുതിർക്കുകയും ഗ്രാനേഡ് എറിയുകയും ചെയ്തു. സേന തിരിച്ചടിച്ചതോടെ തീവ്രവാദികൾ വീടിനടുത്തുള്ള പള്ളിയിലേക്ക് നീങ്ങാൻ ശ്രമിക്കുകയായിരുന്നു. ഇതിനിടെയാണ് ഒരു തീവ്രവാദിയെ സൈന്യം വധിച്ചത്. കൂടുതൽ തീവ്രവാദികളുടെ സാന്നിദ്ധ്യമുള്ളതിനാൽ സുരക്ഷ സേന ഇപ്പോഴും പ്രദേശത്ത് തിരച്ചിൽ തുടരുകയാണ്.