കുവൈറ്റ്: കൊവിഡിനൊപ്പം ഹൃദയാഘാതം മൂലം മരിക്കുന്ന മലയാളികളുടെ എണ്ണം കുവൈറ്റിൽ പെരുകുന്നു. കഴിഞ്ഞ മൂന്നുമാസത്തിനിടെ 17 മലയാളികളാണ് ഹൃദയാഘാതം മൂലം മരിച്ചത്. കൊവിഡ് ബാധിച്ച് മരിച്ചത് 37 മലയാളികളും. എന്തുകൊണ്ട് ഇത്രയുംപേർക്ക് ഹൃദയാഘാതമുണ്ടാകുന്നുവെന്നത് ആരോഗ്യ രംഗത്തെ ചിന്തിപ്പിക്കുകയാണ്.

പേടിയിൽ നിന്നാണ് അധികംപേർക്കും ഹൃദയാഘാതമുണ്ടാകുന്നതെന്നാണ് ആരോഗ്യ വിദഗ്ധർ പറയുന്നത്. കുവൈറ്റിൽ കൊവിഡ് രോഗികളുടെ എണ്ണം കൂടി വരുന്നത് മലയാളികളെ ആശങ്കയിലാഴ്ത്തുന്നു. ഹൃദയാഘാതം മൂലം മരിച്ചവരുടെ സ്രവം പരിശോധിച്ചപ്പോൾ പലരിലും കൊവിഡ് സ്ഥിരീകരിക്കുകയുമുണ്ടായി. കൊവിഡ് പിടിക്കുമോ എന്ന പേടിമൂലമാണ് അധികം പേർക്കും ഹൃദയാഘാതമുണ്ടായത്. ആ പേടി ഇവരിൽ കൊവിഡിൽ കൊണ്ടെത്തിക്കുന്നു.