കൊച്ചി: എറണാകുളം നായരമ്പലത്ത് കൊവിഡ് സ്ഥിരീകരിച്ചയാളുടെ ഉറവിടം കണ്ടെത്താനാകാത്തത് ആശങ്കയാകുന്നു. ഇന്നലെയാണ് ഇയാൾക്ക് കൊവിഡ് സ്ഥിരീകരിച്ചത്. നാൽപ്പത്തി മൂന്നുകാരനായ നായരമ്പലം സ്വദേശിക്ക് പനിയും മറ്റ് രോഗ ലക്ഷണങ്ങളും കണ്ടതിനെ തുടർന്ന് നടത്തിയ പരിശോധനയിലാണ് രോഗം സ്ഥിരീകരിച്ചത്.

താൻ സമീപകാലത്തൊന്നും ദീർഘദൂര യാത്രകൾ നടത്തിയിട്ടില്ലെന്നാണ് ഇയാൾ നൽകിയ പ്രാഥമിക വിവരമെന്ന് ജില്ലാ ഭരണകൂടം അറിയിച്ചു. അതേസമയം ഇയാൾ വിദേശത്ത് നിന്നോ മറ്റ് സംസ്ഥാനങ്ങളിൽ നിന്നോ മടങ്ങി വന്നവരുമായി സമ്പർക്കം പുലർത്തിയിട്ടുണ്ടോ എന്നതടക്കം പരിശോധിക്കുമെന്നും അധികൃതർ വ്യക്തമാക്കി.

രോഗി സന്ദർശിച്ചതിനെത്തുടർന്ന് സ്വകാര്യ ആശുപത്രിയിലെ ഡോക്ടറടക്കം ആറ് പേർ നിരീക്ഷണത്തിലാണ്. ഇതേത്തുടർന്ന് നായരമ്പലം പഞ്ചായത്തിലെ 2,15 വാർഡുകൾ കണ്ടെയ്ൻമെന്റ് സോണായി പ്രഖ്യാപിച്ച് അടച്ചിടുകയും ചെയ്തു. ഇയാളുടെ റൂട്ട് മാപ്പ് തയ്യാറാക്കി വരികയാണെന്ന് ആരോഗ്യവകുപ്പ് അധികൃതർ അറിയിച്ചു.