ദുബായ്: ദുബായിലേക്ക് മടങ്ങിയെത്തുന്ന താമസ വിസക്കാർക്ക് ദുബായ് വിമാനത്താവളത്തിൽ കൊവിഡ് പരിശോധന നിർബന്ധമാക്കാൻ തീരുമാനമായി. വിമാനമിറങ്ങിയ ഉടൻ കൊവിഡ് ആപ്പ് ഡൗൺലോഡ് ചെയ്യണം. പി.സി.ആർ ഫലം ലഭിക്കുന്നതുവരെ ദുബായിലെത്തിയവർ വീട്ടിൽ നിന്ന് പുറത്തിറങ്ങരുതെന്നുമാണ് നിർദേശം.

രോഗമുണ്ടെന്ന് കണ്ടാൽ 14 ദിവസമാണ് നിരീക്ഷണത്തിൽ കഴിയേണ്ട കാലാവധി. വിമാന സർവീസുകൾ സാധാരണ നിലയിലാകാത്തതിനാൽ തന്നെ യു.എ.ഇയിലേക്ക് മടങ്ങാൻ മലയാളികൾ കാത്തിരിക്കേണ്ടി വരും. മലയാളികളുടെ മടക്കം സാദ്ധ്യമാക്കാനായി ദുബായിലേക്ക് ഉടൻ വിമാന സർവീസ് ആരംഭിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്രമോദിക്ക് കത്തയച്ചിട്ടുണ്ട്.

ദുബായിലേക്ക് തിരികെ പോകാനാഗ്രഹിക്കുന്ന താമസവിസക്കാർക്കായി പുതിയ രജിസ്ട്രേഷൻ സംവിധാനമൊരുക്കിയിട്ടുണ്ട്. smart.gdrfad.gov.ae എന്ന വെബ്സൈറ്റിൽ പേര് രജിസ്റ്റർ ചെയ്യണം. അപേക്ഷ അംഗീകരിക്കുകയാണെങ്കിൽ ഉടനടി സന്ദേശം കിട്ടും. ഇതിന് ശേഷമേ ടിക്കറ്റെടുക്കാൻ പാടുള്ളു. വിമാന ടിക്കറ്റിന് gdrfa അപേക്ഷാ നമ്പർ ആവശ്യമാണ്. യാത്രാ സമയത്ത് അനുമതി കിട്ടിയ ഇമെയിലിന്റെ പകർപ്പ് കൈയിൽ കരുതണമെന്ന് എമിറേറ്റ്സ് എയർലൈൻസ് അറിയിച്ചു.