വെഞ്ഞാറമൂട്: വാമനപുരം പാലത്തിന് സമീപം അടഞ്ഞു കിടന്ന തട്ടുകട കത്തി നശിച്ചു. റോഡരികിൽ സ്ഥാപിച്ചിരുന്ന കമുകിൻകുഴി സ്വദേശി സതീശന്റെ ഉടമസ്ഥതയിലുളള തട്ടുകടയിലാണ് തിങ്കളാഴ്ച രാത്രി 9.30 ഒാടെ തീപിടിത്തമുണ്ടായത്. തീപിടിത്തം ശ്രദ്ധയിൽപ്പെട്ട വഴിയാത്രക്കാർ വിവരം അറിയിച്ചതിനെ തുടർന്ന് വെഞ്ഞാറമൂട് ഫയർഫോഴ്സ് സ്ഥലത്തെത്തി തീ നിയന്ത്രണ വിധേയമാക്കി. മേൽക്കൂര പൂർണമായും കത്തിനശിച്ചെങ്കിലും മറ്റ് നാശനഷ്ടങ്ങൾ ഇല്ല. തീപിടിത്തത്തിനുള്ള കാരണം വ്യക്തമല്ലന്ന് ഫയർഫോഴ്സ് ഗ്രേഡ് അസി. സ്റ്റേഷൻ ഓഫീസർ രാജേന്ദ്രൻ നായർ പറഞ്ഞു.