ന്യൂയോർക്ക്: ഐക്യരാഷ്ട്ര സുരക്ഷ സമിതിയിൽ ഇന്ത്യയെ സ്ഥിരാംഗത്വത്തിലേക്ക് പിന്തുണയ്ക്കുമെന്ന് റഷ്യ. ഇക്കഴിഞ്ഞ പതിനെട്ടിന് യു.എൻ രക്ഷാസമിതിയിലേക്ക് ഇന്ത്യ എട്ടാം തവണയും എതിരില്ലാതെ തിരഞ്ഞെടുക്കപ്പെട്ടിരുന്നു. ഇത് എട്ടാം തവണയാണ് ഇന്ത്യ എതിരില്ലാതെ തിരഞ്ഞെടുക്കപ്പെട്ടത്. 193 അംഗ ജനറൽ അസംബ്ലിയിൽ 184 വോട്ടുകളായിരുന്നു ഇന്ത്യയ്ക്ക് ലഭിച്ചിരുന്നത്.

ആകെ 15 അംഗങ്ങളാണ് യു.എൻ രക്ഷാസമിതിയിലുള്ളത്. ഇതിൽ അഞ്ച് രാജ്യങ്ങൾക്ക് സ്ഥിരാംഗത്വമുണ്ട്. അമേരിക്ക, റഷ്യ, ചൈന, യു.കെ, ഫ്രാൻസ് എന്നിവയാണ് സ്ഥിരാംഗങ്ങൾ. 1950-1951, 1967-1968, 1972-1973, 1977-1978, 1984-1985, 1991-1992 എന്നീ വർഷങ്ങളിൽ ഇന്ത്യ യു.എൻ രക്ഷാസമിതി അംഗമായിരുന്നിട്ടുണ്ട്. 2011-12 ലായിരുന്നു ഇന്ത്യ ഏറ്റവുമൊടുവിൽ രക്ഷാസമിതി അംഗമായത്.

യു.എൻ രക്ഷാസമിതിയിൽ സ്ഥിരാംഗമല്ലാത്തവരെ തിരഞ്ഞെടുക്കാനാണ് കൃത്യമായ ഇടവേളകളിൽ തിരഞ്ഞെടുപ്പ് നടക്കുന്നത്. ഇന്ത്യയോടൊപ്പം അയർലൻഡ്, മെക്സിക്കോ, നോർവേ എന്നീ രാജ്യങ്ങളും സുരക്ഷാസമിതി തിരഞ്ഞെടുപ്പിൽ വിജയിച്ചിരുന്നു. ഏഷ്യാ- പസിഫിക് വിഭാഗത്തിലെ അംഗത്തിനായുള്ള തിരഞ്ഞെടുപ്പിൽ സ്ഥാനാർത്ഥിയായിരുന്നു ഇന്ത്യ.