വക്കം: വക്കത്തെ ഇടറോഡുകളിൽ അശാസ്ത്രീയമായി നിർമ്മിച്ചിരിക്കുന്ന ഹംബുകൾ അപകടം വിതയ്ക്കുന്നതായി പരാതി. നൂറോളം ഹംബുകളാണ് ഇടറോഡുകളിൽ ഉള്ളത്. അടുത്തടുത്ത് തന്നെ ഹംബുകളുള്ള നിരവധി ഇട റോഡുകളും ഉണ്ട്. അശാസ്ത്രീയമായ ഉയരത്തിലും, വീതിയിലും നിർമ്മിച്ച ഹംബുകൾ ഇരുചക്ര വാഹങ്ങൾക്കടക്കം ചെറിയ വാഹനങ്ങൾക്ക് എന്നും ഭീഷണിയാകുന്നു. ഇതിന് പുറമേ അകലെ നിന്ന് ഹംബുകൾ തിരിച്ചറിയുന്നതിനുള്ള വെളുത്ത സീബ്രാ വരകളും ഇവിടെ കാണാനില്ല. ഇത് അപകട സാദ്ധ്യത വർദ്ധിപ്പിക്കുന്നു. ചെറിയ ഇട റോഡുകളിൽ പോലും അടുത്തടുത്തുള്ള ഹംബുകൾ പലതും സ്വകാര്യ വ്യക്തികൾ അനധികൃതമായി നിർമ്മിച്ചതാണെന്നും പരാതിയുണ്ട്. മഴക്കാലങ്ങളിൽ വക്കം മേഖകളിൽ റോഡുകളിൽ വെള്ളക്കെട്ടുകൾ സാധാരണമാണ്. ഇത്തരം സന്ദർഭങ്ങളിൽ ഹംബുകൾ കാണാൻ കഴിയാത്ത അവസ്ഥയുമാണ്. നിത്യവും ഇത് നിരവധി അപകടങ്ങൾക്ക് കാരണമായി മാറുന്നു. ഹംബുകൾ സ്ഥാപിക്കുമ്പോൾ പാലിക്കേണ്ട മാനദണ്ഡങ്ങൾ കാറ്റിൽ പറത്തിയാണിവിടുത്തെ നിർമ്മാണമെന്ന് നാട്ടുകാർ പറയുന്നു. അശാസ്ത്രീയമായും, അനധികൃതമായും നിർമ്മിക്കുന്ന ഹംബുകൾ നീക്കം ചെയ്യാനോ, നടപടികൾ സ്വീകരിക്കാനോ അധികൃതർ മുന്നോട്ട് വരണമെന്നാണ് നാട്ടുകാരുടെ ആവശ്യം.