തിരുവനന്തപുരം: സമൂഹ വ്യാപന സാദ്ധ്യതയ്ക്ക് തടയിടാൻ നഗരത്തിലെ ചാല,പാളയം എന്നീ പ്രധാന മാർക്കറ്റുകളിലും വിവിധ മാളുകളിലെ സൂപ്പർമാർക്കറ്റുകളിലും നഗരസഭ ഏർപ്പെടുത്തിയിട്ടുള്ള നിയന്ത്രണങ്ങൾക്ക് ഇന്നലെ തുടക്കമായി. നിയന്ത്രണങ്ങളുടെ ഭാഗമായി പഴം,പച്ചക്കറി കടകൾ അടച്ചിടണമെന്ന് നിർദ്ദേശമുണ്ടായിരുന്ന ഇന്നലെ ഇരു മാർക്കറ്റുകളിലെയും പഴം,പച്ചക്കറി കടകൾ പൂർണമായും അടഞ്ഞു കിടന്നു. ഒന്നിടവിട്ട ദിവസങ്ങളിൽ തുറക്കാൻ ധാരണയായ നഗരത്തിലെ പ്രധാന മാളുകളിലെ സൂപ്പർമാർക്കറ്റുകളും അടഞ്ഞു കിടന്നു. നിയന്ത്രണങ്ങൾ പാലിക്കുന്നുണ്ടോ എന്ന് ഉറപ്പുവരുത്തുന്നതിനായി രാവിലെ മുതൽ തന്നെ ചാല,പാളയം മാർക്കറ്റുകളിൽ മേയർ കെ.ശ്രീകുമാറിന്റെ നേതൃത്വത്തിൽ പരിശോധന നടന്നു. നഗരസഭ നേരത്തെ പ്രഖ്യാപിച്ച നാല് ഹെൽത്ത് സ്‌ക്വാഡുകൾക്ക് പുറമേ രണ്ട് സ്‌പെഷ്യൽ സ്‌ക്വാഡുകൾ കൂടി രംഗത്തുണ്ടായിരുന്നു. പഴം,പച്ചക്കറി കടകൾ അടഞ്ഞു കിടന്നപ്പോൾ തന്നെ മാർക്കറ്റുകളിലെ തിരക്ക് പകുതിയോളം കുറഞ്ഞു. മാർക്കറ്റുകളിലേക്ക് ആളുകൾ പ്രവേശിക്കുന്നത് പൊലീസ് ഇടപെട്ട് നിയന്ത്രിച്ചു. പലചരക്ക്, മത്സ്യം, മാംസം എന്നിവ വില്പന നടത്തുന്ന അമ്പത് ശതമാനം കടകളാണ് തുറന്നു പ്രവർത്തിച്ചത്. ഒന്നിടവിട്ട ദിവസങ്ങളിൽ തുറക്കുന്നതിന് കടകൾക്ക് ടോക്കൺ സിസ്റ്റം ഏർപ്പെടുത്തിയിരിക്കുകയാണ്.
ബുധനാഴ്ച മുതൽ തന്നെ നിയന്ത്രണങ്ങൾ നടപ്പിൽ വരുത്താനാണ് നഗരസഭ തീരുമാനിച്ചിരുന്നതെങ്കിലും പഴം, പച്ചക്കറി വ്യാപാരികൾ ഉത്പന്നങ്ങൾ സംഭരിച്ചിരുന്നിരുന്നതിനാൽ വ്യാപാരികളുടെ അഭ്യർത്ഥന പ്രകാരം ബുധനാഴ്ച ഇളവുകൾ നൽകുകയായിരുന്നു. മാളുകളിലെ സൂപ്പർമാർക്കറ്റുകളിലും ഹെൽത്ത് ഡ്ക്വാഡുകളുടെ നേതൃത്വത്തിൽ പരിശോധന നടത്തി നിയന്ത്രണങ്ങൾ വിലയിരുത്തി. പത്ത് ദിവസത്തേക്കാണ് നിലവിൽ ക്രമീകരണങ്ങൾ ഏർപ്പെടുത്തിയിരിക്കുന്നത്. നിയന്ത്രണങ്ങൾ ലംഘിച്ച് മാസ്‌ക്,സാനിറ്റെസർ, ശാരീരിക അകലം എന്നിവ ഉറപ്പാക്കാതെ പ്രവർത്തിക്കുന്ന കടകൾ അടച്ചു പൂട്ടുമെന്നും അത്തരം കടകളുടെ ലൈസൻസ് താത്കാലികമായി റദ്ദാക്കുമെന്നും മേയർ പറഞ്ഞു. നിയന്ത്രണങ്ങളിൽ വ്യാപാരികളുടെ ഭാഗത്തു നിന്ന് നല്ല സഹകരണമാണ് ഉണ്ടായിട്ടുള്ളതെന്നും അദ്ദേഹം കൂട്ടിച്ചേർത്തു.
ചാല, പാളയം മാർക്കറ്റുകളിൽ കടകൾക്കുള്ള ക്രമീകരണം
പഴം,പച്ചക്കറി കടകൾ - തിങ്കൾ,ചൊവ്വ,വെള്ളി,ശനി ദിവസങ്ങളിൽ തുറന്ന് പ്രവർത്തിക്കും
പലവ്യഞ്ജനങ്ങൾ,സ്റ്റേഷണറി,ചിക്കൻ എന്നിവ വിൽക്കുന്ന കടകൾ- ഒന്നിടവിട്ട ദിവസങ്ങളിൽ പ്രവർത്തിക്കും
ചെറുകിട തുണിക്കടകൾ എല്ലാ ദിവസവും തുറന്ന് പ്രവർത്തിക്കും
മത്സ്യം, മാംസം എന്നിവ വിൽക്കുന്ന കടകൾ ഉൾപ്പെടെയുള്ള മറ്റുവ്യാപാര സ്ഥാപനങ്ങൾ ഓരോ കാറ്റഗറിയിലും മൊത്തം സ്ഥാപനങ്ങളുടെ 50 ശതമാനം സ്ഥാപനങ്ങൾ മാത്രം ഓരോ ദിവസവും പ്രവർത്തിക്കുന്ന രീതിയിലാണ് ക്രമീകരണം.
മാളുകളിലെ സൂപ്പർ മാർക്കറ്റുകളിലെ ക്രമീകരണം
തിങ്കൾ,ബുധൻ,വെള്ളി,ശനി - മാളുകളിലെ സൂപ്പർ മാർക്കറ്റുകൾക്ക് തുറന്ന് പ്രവർത്തിക്കാം.
അവധി ദിവസങ്ങളിൽ ഹോം ഡെലിവറി മാത്രം.ഈ ദിവസങ്ങളിൽ മാളുകളിലെ സൂപ്പർ മാർക്കറ്റുകളിൽ പൊതുജനങ്ങൾക്ക് പ്രവേശനമില്ല.