തിരുവനന്തപുരം: ഡ്രൈവർ കുഴഞ്ഞ് വീണതിനെ തുടർന്ന് നിയന്ത്രണം നഷ്ടപ്പെട്ട കണ്ടെയ്നർ ലോറിയിൽ ചാടിക്കയറി വാഹനം നിറുത്തി വൻദുരന്തം ഒഴിവാക്കിയ സീനിയർ സിവിൽ പൊലീസ് ഓഫീസറിന് സംസ്ഥാന പൊലീസ് മേധാവിയുടെ പാരിതോഷികം.
പാലക്കാട് ആലത്തൂർ ഹൈവേ പൊലീസിൽ ഡ്രൈവറായ ആർ. വിനോദിനാണ് 3000 രൂപ പാരിതോഷികവും അഭിനന്ദന സർട്ടിഫിക്കറ്റും നൽകാൻ സംസ്ഥാന പൊലീസ് മേധാവി ലോക്‌നാഥ് ബെഹ്‌റ ഉത്തരവിട്ടത്.
വെള്ളിയാഴ്ച രാവിലെ ആലത്തൂർ സ്വാതി ജംഗ്ഷനിലായിരുന്നു സംഭവം. ഇടറോഡിൽ സ്വന്തം ബൈക്കിന് സിഗ്നൽ കാത്തുനിൽക്കവെയാണ് ഹൈവേയിലൂടെ വന്ന കണ്ടെയ്നർ ലോറി അപകടകരമായി റോഡരികിലേക്ക് നീങ്ങുന്നത് വിനോദിന്റെ ശ്രദ്ധയിൽപ്പെട്ടത്. ലോറിക്ക് മുന്നിലായി ധാരാളം വാഹനങ്ങളുമുണ്ടായിരുന്നു. ലോറിഡ്രൈവർ സ്റ്റിയറിങ്ങിൽ തളർന്നുകിടക്കുന്നത് കണ്ട വിനോദ് വേഗം ഡ്രൈവറുടെ കാബിൻ തുറന്ന് ലോറിക്കകത്തു കയറി ബ്രേക്ക് ചെയ്‌ത് വാഹനം നിറുത്തുകയായിരുന്നു.
ഇതിനിടെ ഡ്രൈവർ വിനോദിന്റെ ദേഹത്തേക്ക് വീണു. ഉത്തർപ്രദേശ് സ്വദേശിയായ ഇദ്ദേഹത്തെ ആശുപത്രിയിലെത്തിച്ചു.