ചേർത്തല:എസ്.എൻ.ഡി.പി യോഗ നേതൃത്വത്തിന്റെ വിശ്വാസം പിടിച്ചുപ​റ്റി ഔദ്യോഗിക സ്ഥാനമാനങ്ങൾ നേടിയ ശേഷം യോഗത്തെയും നേതൃത്വത്തെയും ചെളി വാരിയെറിയുന്ന കുലംകുത്തികളെ സമുദായം ഒ​റ്റപ്പെടുത്തിയചരിത്രമാണുള്ളതെന്ന് ശ്രീനാരായണ എംപ്ലോയീസ് ഫോറം കേന്ദ്ര എക്‌സിക്യുട്ടിവ് കമ്മി​റ്റി അഭിപ്രായപ്പെട്ടു. മൈക്രോഫിനാൻസ് പദ്ധതിക്ക് തുരങ്കം വച്ചവർക്ക്‌ സമുദായം മാപ്പ്‌ കൊടുക്കില്ല. പടനായകനെ വീഴ്ത്തി പടയെ ഛിന്നഭിന്നമാക്കി അധികാരം കയ്യാളാമെന്നുള്ള സ്വാർത്ഥമോഹം എസ്.എൻ.ഡി.പി യോഗത്തിൽ നടപ്പാവില്ല. നേതാവില്ലാത്ത പ്രസ്ഥാനമെന്ന് ആക്ഷേപിക്കപ്പെട്ട യോഗത്തെ ശാഖാതലം മുതൽ ശക്തരായ നേതാക്കളുള്ള പ്രസ്ഥാനമാക്കി മാ​റ്റിയ ജനറൽ സെക്രട്ടറി വെള്ളാപ്പള്ളി നടേശനും വൈസ് പ്രസിഡന്റ് തുഷാർ വെള്ളാപ്പള്ളിക്കും എതിരെയുള്ള നുണ പ്രചരണങ്ങളെ നേരിമെന്നും യോഗം വ്യക്തമാക്കി. പ്രസിഡന്റ് എ.അജുലാൽ അദ്ധ്യക്ഷനായി. വീഡിയോ കോൺഫറൻസ് വഴി നടത്തിയ യോഗത്തിൽ കോ-ഓർഡിനേ​റ്റർ പി.വി. രജിമോൻ,സെക്രട്ടറി ഡോ. വി.ശ്രീകുമാർ, ട്രഷറർ ബി.ശിവപ്രസാദ്, വൈസ് പ്രസിഡന്റുമാരായ ബിജു പുളിക്കലേടത്ത്,ഷിബു കൊ​റ്റമ്പള്ളി, കെ.പി.ഗോപാലകൃഷ്ണൻ, ജോയിന്റ് സെക്രട്ടറിമാരായ ദിനു വാലുപറമ്പിൽ, കുട്ടനാട് ഗോകുൽദാസ്,സുനിൽ താമരശേരി, ജിജി രാജാക്കാട്, എം.എം.മജേഷ് ഹൈറേഞ്ച്, ഷിബു ശശി എന്നിവർ പങ്കെടുത്തു.