 താലൂക്കിൽ ഗതാഗത നിയന്ത്രണം

ആലപ്പുഴ: ചേർത്തല താലൂക്കിന്റെ പരിധിയിലുള്ള മുഴുവൻ പ്രദേശങ്ങളും കണ്ടെയ്ൻമെന്റ് സോണായി പ്രഖ്യാപിച്ച് കളക്ടർ ലോക്ക് ഡൗൺ ഉത്തരവിറക്കി. മാവേലിക്കര താലൂക്കിലെ നൂറനാട്, പാലമേൽ, താമരക്കുളം ഗ്രാമപഞ്ചായത്തുകളുടെ പരിധിയിലുള്ള മുഴുവൻ പ്രദേശങ്ങളും ലാർജ് ക്ലസ്റ്റർ, കണ്ടെയ്ൻമെന്റ് സോണുകളായി പ്രഖ്യാപിച്ചു.

ചേർത്തല താലൂക്കിൽ ഉറവിടം അറിയാത്ത ധാരാളം കൊവിഡ് കേസുകളും സമ്പർക്കത്തിലൂടെയുള്ള രോഗബാധയും സ്ഥിരീകരിച്ചതിനെ തുടർന്നാണ് തീരുമാനം. നിരവധി ആരോഗ്യ പ്രവർത്തകർക്ക് സമ്പർക്കത്തിലൂടെ രോഗബാധ ഉണ്ടായിട്ടുണ്ട്. മാവേലിക്കര താലൂക്കിലെ ഐ.ടി.ബി.പി ബറ്റാലിയനിലെ 50 ൽ അധികം ഉദ്യോഗസ്ഥർക്കും കൊവിഡ് സ്ഥിരീകരിച്ചിട്ടുണ്ട്.

താലൂക്കിലെ റോഡുകളിലൂടെയുള്ള ഗതാഗതം നിരോധിച്ചു. അവശ്യ വസ്തുക്കളുടെ വിതരണത്തിനും, അടിയന്തര വൈദ്യ സഹായത്തിനുള്ള യാത്രയ്ക്കും നിയന്ത്രണങ്ങൾക്ക് വിധേയമായി ഇളവുകൾ ഉണ്ടായിരിക്കും. ദേശീയപാതയിലൂടെയും, കായംകുളം - പുനലൂർ റോഡിലൂടെയും ഗതാഗതം അനുവദിക്കും. എന്നാൽ നിയന്ത്രണങ്ങൾ ഉളള പ്രദേശങ്ങളിൽ റോഡുകളിലൂടെ യാത്ര ചെയ്യുന്നവർ വാഹനങ്ങളിൽ നിന്ന് ഇറങ്ങാനോ, കയറാനോ പാടില്ല.

അവശ്യ, ഭക്ഷ്യവസ്തുക്കൾ വിതരണം ചെയ്യുന്ന സ്ഥാപനങ്ങൾക്ക് മാത്രം രാവിലെ 8 മുതൽ 11 വരെയും പൊതുവിതരണ സ്ഥാപനങ്ങൾക്ക് (പി.ഡി.എസ്) രാവിലെ 8 മുതൽ ഉച്ചയ്ക്ക് 2 വരെയും പ്രവർത്തിക്കാം. ഒരേ സമയം അഞ്ചിലധികം പേർ എത്താൻ പാടില്ല. മറ്റ് സ്ഥാപനങ്ങൾ തുറക്കരുത്.

# നിയന്ത്രണങ്ങൾ

 ഒരു കാരണവശാലും നാലിലധികം ആളുകൾ കൂടാൻ പാടില്ല

 പൊലീസ് നിരീക്ഷണം ശക്തമാക്കും
 പുറത്തുനിന്ന് അവശ്യ വസ്തുക്കൾ ആവശ്യമായാൽ പൊലീസ് / വാർഡ് ആർ.ആർ.ടികളുടെ സേവനം തേടാം

 പ്രദേശങ്ങളിലെ ആരാധാനാലയങ്ങൾ തുറക്കരുത്

 വിവാഹം, മരണാനന്തര ചടങ്ങുകൾ എന്നിവയിൽ 20 പേർക്ക് മാത്രം പങ്കെടുക്കാം

........................................

# നടപടി കടുക്കും

കൊവിഡ് രോഗനിർവ്യാപന പ്രവർത്തനവുമായി നേരിട്ട് ബന്ധമുള്ള സർക്കാർ ഓഫീസുകൾ മാത്രം അവശ്യ ജീവനക്കാരെ വച്ച് പ്രവർത്തിപ്പിക്കാം. പൊലീസ്, ട്രഷറി, പെട്രോളിയം, എൽ.പി.ജി, പോസ്റ്റ് ഓഫീസുകൾ എന്നിവയ്ക്കും നിയന്ത്രണ മാനദണ്ഡങ്ങൾ പാലിച്ച് പ്രവർത്തിക്കാം. ഉത്തരവുകൾ ലംഘിക്കുന്നവർക്കെതിരെ പകർച്ചവ്യാധി നിയന്ത്രണ നിയമപ്രകാരവും ദുരന്തനിവാരണ നിയമപ്രകാരവും നിയമനടപടികൾ സ്വീകരിക്കും.