ആലപ്പുഴ: അച്ചൻകോവിലാറ്റിൽ മത്സ്യബന്ധനത്തിനിടെ ഉൾനാടൻ മത്സ്യത്തൊഴിലാളി ചെറുകോൽ കറുകയിൽ തെക്കതിൽ ജി.ആംബ്രോസ് (63) മുങ്ങി മരിച്ചു. ഇന്നലെ രാവിലെ 9.30ഓടെ കണ്ടിയൂർ പറക്കടവിന് സമീപം മുക്കത്ത് കടവിലായിരുന്നു സംഭവം.

ആംബ്രോസ് ആറ്റിൽ നിന്ന് പിടിച്ച മീൻ കടവിന് സമീപത്തുള്ള ഒരാൾക്ക് കൊടുത്തിരുന്നു. ഇവർ വീട്ടിൽ നിന്ന് പണമെടുത്ത് തിരികെയെത്തിയപ്പോൾ ആംബ്രോസിനെ കാണാതായി. മത്സ്യബന്ധനവള്ളം അലക്ഷ്യമായി നീങ്ങുന്നതും ശ്രദ്ധയിൽപെട്ടു. വീട്ടുകാർ ഉടൻ മാവേലിക്കര പൊലീസിനെയും ഫയർഫോഴ്‌സിനേയും വിവരം അറിയിച്ചു. ഫയർഫോഴ്‌സും നാട്ടുകാരും ചേർന്ന് നടത്തിയ തെരച്ചിലിൽ കടവിന് സമീപത്ത് നിന്ന് മൃതദേഹം കണ്ടെടുത്തു. വീശിയ വല വള്ളത്തിലേക്ക് വല വലിച്ചു കയറ്റുന്നതിനിടെ കാൽവഴുതി വീണതാകാമെന്നാണ് പ്രാഥമിക നിഗമനം. കൊവിഡ് പരിശോധനയ്ക്ക് ശേഷം മൃതദേഹം ബന്ധുക്കൾക്ക് വിട്ടുകൊടുക്കും. സംസ്‌കാരം പിന്നീട്. ഭാര്യ: പുഷ്പമ്മ. മക്കൾ: ജസ്റ്റിൻ, സെബാസ്റ്റ്യൻ, ജാൻസി, മരുമക്കൾ: ഷിജു, ലക്ഷ്മി, ജിൻസി