ന്യൂഡൽഹി: തമിഴ്​നാട്ടിലെ കോയമ്പത്തൂരിൽ പച്ചമരുന്നുകൾ അരച്ചുചേർത്ത് തയാറാക്കിയ 'സ്പെഷ്യൽ മൈസൂർപാക്ക്' കഴിച്ച് കൊവിഡ് മാറ്റൂ എന്ന് വ്യാജ പ്രചാരണം നടത്തിയ ബേക്കറി പൊലീസ് അടച്ച് പൂട്ടി സീൽ ചെയ്​തു.

സിദ്ധ വൈദ്യൻമാരായ പൂർവികരിൽ നിന്ന് കൈമാറി കിട്ടിയ പച്ചമരുന്ന്​ ചേർത്തുണ്ടാക്കിയതാണ്​ മൈസൂർ പാക്ക്​ എന്നും ഇത്​ കഴിച്ചാൽ​ ഒറ്റ ദിവസം കൊണ്ട്​ കൊവിഡ്​ ഭേദമാവുമെന്നുമായിരുന്നു പ്രചാരണം.

ഔഷധഗുണമുള്ള പലഹാരം കഴിഞ്ഞ മൂന്ന്​ മാസമായി കൊവിഡ്​ രോഗികൾക്കും അവരുടെ വീട്ടുകാർക്കും വിതരണം ചെയ്യാറുണ്ടെന്നും അത്​ ഫലപ്രദമായിരുന്നു എന്നും കടയുടമ വാദിച്ചു.

ഇയാൾ കോയമ്പത്തൂർ നഗരത്തിൽ ‘നെല്ലൈ ലാല സ്വീറ്റ്​സ്​’ എന്ന പേരിൽ എട്ട്​ പലഹാരക്കടകൾ നടത്തുന്നുണ്ട്.

‘‘കൊവിഡ്​ ബാധിതർക്ക്​ ഒറ്റ ദിവസംകാണ്ട്​ രോഗമുക്തി, അത്​ഭുതം! അതെ, ചിന്നിയംപാളയത്തും വെള്ളാളൂരിലും ഔഷധ മൈസൂർപാക്കിലൂടെയാണ്​ ഇത്​ സംഭവിക്കുന്നത്​.’’ - എന്നാണ്​ നോട്ടീസിലെ വാചകം. ഔഷധ മൈസൂർ പാക്ക്​ അവരുടെ വീട്ടിൽ എത്തിച്ചു നൽകാൻ തങ്ങൾ തയാറാണെന്നും ​നോട്ടീസിൽ പറയുന്നു.

തന്റെ മുത്തച്ഛൻ ഒരു സിദ്ധ വൈദ്യനായിരുന്നു. അദ്ദേഹം പനിക്ക്​ ലേഹ്യം ഉണ്ടാക്കാറുണ്ടായിരുന്നു. അക്കാലത്ത്​ അത്തരം പനികൾ ഒരിടത്തു നിന്ന്​ മറ്റിടങ്ങളിലേക്ക്​ പടരാറുണ്ടായിരുന്നു. ശ്വാസം മുട്ടും അനുഭവ​പ്പെടും. അത്​ ലേഹ്യമായി വിൽക്കാൻ പ്രത്യേകം ലൈസൻസ്​ ആവശ്യമായതിനാൽ ഞങ്ങൾ​ അത്​ പലഹാരത്തിൽ പ്രയോഗിച്ചു. 50 പ്രമേഹ രോഗികൾക്കും താൻ ഈ പലഹാരം നൽകിയിട്ടു​ണ്ടെന്നും ആർക്കും പാർശ്വഫലങ്ങളൊന്നും ഉണ്ടായിട്ടില്ലെന്നാണ് കടയുടമയുടെ വിശദീകരണം.ആരോഗ്യ വകുപ്പിലേയും ഭക്ഷ്യ സുരക്ഷ വിഭാഗത്തിലേയും ഉദ്യോഗസ്ഥർ കടയിലെത്തി പരിശോധന നടത്തി. കട സീൽ ചെയ്​തതായും കടയുടമ അവകാശപ്പെടുന്ന ഔഷധ മൈസൂർ പാക്കും അത്​ നിർമിക്കാനുപയോഗിച്ച സാധനങ്ങളും പിടിച്ചെടുത്തതായും അധികൃതർ അറിയിച്ചു.