ന്യൂഡൽഹി: ലോക്ഡൗണിൽ സിനിമാഷൂട്ടിംഗ് നിലച്ചതോടെ സ്വന്തം വീട്ടിൽ ചൂതാട്ടകേന്ദ്രം നടത്തി ലക്ഷങ്ങൾ സമ്പാദിച്ച തെന്നിന്ത്യൻ സിനിമാനടൻ ഷംസുദ്ദീൻ ഇബ്രഹിം (ഷാം) അറസ്​റ്റിൽ. സംവിധായകനും വ്യവസായ പ്രമുഖരും വൻകിട വ്യാപാരികളും ഉൾപ്പെടെ 12 പേരും ഷാമിനൊപ്പം പിടിയിലായി​.

ചൂതാട്ടത്തിൽ വൻതുക നഷ്ടപ്പെട്ട പ്രമുഖ നടനാണ് ഒറ്റിയതെന്നാണ് വിവരം. ചെന്നൈ നുങ്കംപാക്കത്തെ സ്വന്തം അപ്പാർട്ട്​മെന്റിലാണ് ഷാം ചൂതാട്ട കേന്ദ്രം ആരംഭിച്ചത്​. രാ​ത്രി 11 മുതൽ പുലർച്ച നാല്​ വരെയായിരുന്നു പ്രവർത്തനം. രഹസ്യവിവരത്തെ തുടർന്ന് തിങ്കളാഴ്​ച രാത്രി നുങ്കംപാക്കം അസി. കമ്മിഷണർ മുത്തുവേൽപാണ്ടിയുടെ നേതൃത്വത്തിൽ പൊലീസ്​ ടീം മിന്നൽ പരിശോധന നടത്തിയതോടെയാണ് ഷാം പിടിയിലായത്. ലക്ഷക്കണക്കിന്​ രൂപയും ചൂതാട്ടത്തിന്​ ഉപയോഗിച്ച ടോക്കണുകളും ചീട്ടുകെട്ടുകളും മറ്റും പൊലീസ്​ കണ്ടെടുത്തു. ചൂതാട്ട നിയമപ്രകാരം അറസ്​റ്റിലായ പ്രതികളെ സ്​റ്റേഷൻ ജാമ്യത്തിൽ വിട്ടയച്ചു. ചൂതാട്ടത്തിൽ പങ്കെടുത്തവരെക്കുറിച്ചുള്ള അന്വേഷണം തുടരുകയാണെന്ന് പൊലീസ് അറിയിച്ചു.

മോഡലിംഗിലൂടെ തമിഴ് സിനിമാരംഗത്ത് എത്തിയ ഷാമിന്റെ ആദ്യ ചിത്രം 2001ൽ പുറത്തിറങ്ങിയ 12ബിയാണ്. കന്നട, തമിഴ് ചിത്രങ്ങളിൽ നായകവേഷങ്ങൾ ചെയ്തിട്ടുണ്ട്. വില്ലൻ, സ്വഭാവ നടൻ വേഷങ്ങൾ ചെയ്​തു വരികയായിരുന്നു. മലയാളത്തിൽ 'ഗ്രേറ്റ് ഫാദർ' എന്ന ചിത്രത്തിൽ അഭിനയിച്ചിട്ടുണ്ട്.