കൊച്ചി: പഠിച്ചിറങ്ങിയ കലാലയത്തിലെ ക്ലാസ് മുറി പൊളിച്ചുവില്ക്കുന്നതു കണ്ടപ്പോൾ ധർമ്മതീർത്ഥന്റെ നെഞ്ചു പൊള്ളി. കട്ടിളയും കതകും പറഞ്ഞ വിലയ്ക്കുവാങ്ങി വീടിന് ഉമ്മറപ്പടിയാക്കി സങ്കടം തീർത്തു,​ തൃപ്പൂണിത്തുറ ആർ.എൽ.വി സംഗീത കോളേജിലെ ആ പൂർവവിദ്യാർത്ഥി. പുതിയ വീടിന് ആർ.എൽ.വി സംഗീത ഭവൻ എന്ന് പേരുമിട്ടു. കഥ തീർന്നില്ല; സ്വന്തം വീടായ ആർ.എൽ.വിയിൽ നിന്ന് ധർമ്മതീർത്ഥന് ഇനി പഴയ ആർ.എൽ.വിയിലേക്ക് ജോലിക്കു പോകാം! ഹൃദയത്തോട് ചേർത്തുപിടിച്ച കോളേജിൽ വീണാവിഭാഗം ലക്‌ചറർ ആയി ധർമ്മതീർത്ഥന് നിയമനം ലഭിച്ചത് മുപ്പത്തിനാലാം വയസിൽ,​ കഴിഞ്ഞ മാസം 26 ന്.

2003 ൽ ബി.എ (വീണ)​ വിദ്യാ‌ർത്ഥിയായാണ് കൊടുങ്ങല്ലൂർ‌ മേത്തല തേവാലിൽ ധർമ്മതീർത്ഥൻ ആർ.എൽ.വിയിൽ എത്തുന്നത്. 2006 ൽ ബിരുദാനന്തര ബിരുദത്തിനു ചേർന്നെങ്കിലും പഠനം മുടങ്ങി. രണ്ടു വർഷത്തിനു ശേഷം കോഴ്സ് പൂർത്തിയാക്കി. 2016 മുതൽ മൂന്നുവർഷം ഗസ്റ്റ് അദ്ധ്യാപകൻ. 2008 ൽ പൂർണത്രയീശന്റെ വൃശ്ചികോത്സവത്തിനെത്തിയപ്പോൾ പഴയക്ലാസ് മുറി പൊളിക്കുന്നതു കണ്ട് ധർമ്മതീർത്ഥന്റെ കണ്ണു നിറഞ്ഞു.

പക്ഷെ,​ സങ്കടപ്പെട്ട് വെറുതെയിരുന്നില്ല. കെട്ടിടം പൊളിക്കാൻ കരാറെടുത്ത മലപ്പുറത്തുകാരൻ സേട്ടുവിനെക്കണ്ട്,​ ക്ളാസ് മുറിയുടെ കട്ടിളയും കതകും കുറെ ഉരുപ്പടികളും ഏഴായിരം രൂപയ്ക്ക് വാങ്ങി. വീടുപണിയെക്കുറിച്ചൊന്നും അതുവരെ ചിന്തിച്ചിട്ടേയില്ല. പിന്നെ സംഭവിച്ചതെല്ലാം യാദൃച്ഛികം. വീട് മാത്രമായി മനസ്സിൽ. പഴയ മാതൃകയിലെ നാലുകെട്ടാണ് ഉള്ളിൽ. പലസ്ഥലങ്ങളിൽ നിന്നായി,​ പൊളിച്ചുവിൽക്കുന്ന അറയും നിരയുമുൾപ്പെടെ വിലയ്ക്കു വാങ്ങി. 40 ലക്ഷത്തോളം രൂപ ചെലവഴിച്ച് കഴിഞ്ഞ മാസം വീടുപണി ഏതാണ്ട് പൂർത്തിയാക്കി താമസം തുടങ്ങിയപ്പോൾ സരസ്വതീ കടാക്ഷം പോലെ വരുന്നു,​ കോളേജിൽ സ്ഥിരനിയമന ഉത്തരവ്. ലോക്ക് ഡൗൺ കഴിഞ്ഞ്,​ പഴയ കലാലയത്തിലേക്ക് അദ്ധ്യാപകനായെത്തുന്നത് മനസ്സിൽ കാണുമ്പോൾ ധർമ്മതീർത്ഥന്റെ നെഞ്ചിൽ ആഹ്ളാദശ്രുതി.

ആർ.എൽ.വി മ്യൂസിക് കോളേജ്

# ദക്ഷിണേന്ത്യയിലെ ശാന്തിനികേതൻ

# 1937ൽ കൊച്ചി രാജകുടുംബത്തിലെ മഹാരാജ കേരളവർമ്മ കൊച്ചുണ്ണി തമ്പുരാനാണ് സ്ഥാപിച്ചത്

# മകൾ രാധയുടെയും ഭാര്യ ലക്ഷ്മിയുടെയും പേരു ചേർത്ത് രാധാലക്ഷ്മി വിലാസം (ആർ.എൽ.വി)​ എന്നു പേരിട്ടു

# 1956ൽ കോളേജ് സർക്കാർ ഏറ്റെടുത്തു. 1998ൽ എം.ജി യൂണിവേഴ്സിറ്റിയിൽ അഫിലിയേറ്റ് ചെയ്തു

# 13 ബിരുദകോഴ്സുകളും 13 ബിരുദാനന്തര കോഴ്സുകളും

# 500ൽപ്പരം വിദ്യാർത്ഥികളും 60 അദ്ധ്യാപകരും