മൂവാറ്റുപുഴ: പോത്താനിക്കാട് കെ.എസ്.ഇ.ബി സെക്ഷൻ ഓഫീസിന് സ്വന്തമായി കെട്ടിടം എന്ന സ്വപ്നം യാഥാർത്ഥ്യമാകുന്നു. പുതിയ കെട്ടിടത്തിന്റെ കോൺക്രീറ്റിഗ് ജോലികൾ എൽദോ എബ്രഹാം എം.എൽ.എ ഉദ്ഘാടനം ചെയ്തു.പോത്താനിക്കാട്, പൈങ്ങോട്ടൂർ, ആയവന, പല്ലാരിമംഗലം, വാരപ്പെട്ടി, കവളങ്ങാട് ഗ്രാമപഞ്ചായത്തുകളിലെ ആയിരക്കണക്കിന് ഉപഭോക്താക്കളുടെ വൈദ്യുതി വിതരണം നിയന്ത്രിക്കുന്ന ഓഫീസാണിത്. ചടങ്ങിൽ അസി.എക്‌സിക്യൂട്ടീവ് എൻജിനീയർ സന്തോഷ് പി. എബ്രഹാം, ജില്ലാ പഞ്ചായത്തംഗം കെ.ടി.അബ്രഹാം, ബ്ലോക്ക് പഞ്ചായത്ത് അംഗം വിൻസൻ ഇല്ലിക്കൽ, അസി.എൻജിനീയർ പി.ജി.ഗണേഷ് കുമാർ, സബ് എൻജിനീയർ സജി പോൾ,വിവിധ രാഷ്ട്രീയ കക്ഷി പ്രതിനിധികളായ ഏ .കെ. സിജു, എൻ. എ. ബാബു, കെ. പി .ജയിംസ്, എൽദോസ് പുത്തൻപുര എന്നിവർ പങ്കെടുത്തു.

#ചിലവ് 48 ലക്ഷം

തുടക്കം മുതലേ വാടകകെട്ടിടങ്ങളിലെ അസൗകര്യങ്ങളിൽ പ്രവർത്തിച്ചു വന്ന ഓഫീസിന് വേണ്ടി പോത്താനിക്കാട് ടെലിഫോൺ എക്‌സ്‌ചേഞ്ചിനോട് ചേർന്ന് വൈദ്യുതി വകുപ്പിന്റെ ഉടമസ്ഥതയിലുള്ള 20 സെന്റ് സ്ഥലത്ത് വൈദ്യുതി വകുപ്പിൽ നിന്നും അനുവദിച്ച 48 ലക്ഷം രൂപ ഉപയോഗിച്ചാണ് ഇരുനില കെട്ടിടം നിർമ്മിക്കുന്നത് . നിലവിൽ 12000 രൂപ മാസ വാടക നൽകിയാണ് സെക്ഷൻ ഓഫീസ് പ്രവർത്തിക്കുന്നത്.ആറു പഞ്ചായത്തുകളിലായി 136 കിലോമീറ്റർ 11 കെ.വി ലൈനുകളും 1000 കിലോമീറ്റർ എൽ.ടി ലൈനുകളും 179 ട്രാൻസ്‌ഫോർമറുകളും ഉള്ള ഒരു വലിയ സെക്ഷനാണ് പോത്താനിക്കാട് ഇലക്ട്രിക്കൽ സെക്ഷൻ.23000 ഓളം ഉപഭോക്താക്കളും ഈ സെക്ഷനു കീഴിലുണ്ട്. ഒരു അസിസ്റ്റന്റ് എൻജിനീയറും മൂന്നു സബ് എൻജീനീയർമാരും ഉൾപ്പെടെ 36 ജീവനക്കാരാണ് ഈ സെക്ഷനിൽ ജോലി ചെയ്യുന്നത്.