കൊച്ചി : കൊല്ലം എസ്.എൻ. കോളേജിന്റെ സുവർണജൂബിലി ആഘോഷങ്ങൾക്ക് സമാഹരിച്ച ഫണ്ടിൽ ക്രമക്കേടുകാട്ടിയെന്ന കേസുമായി ബന്ധപ്പെട്ട ഹർജിയിൽ കക്ഷിചേരാൻ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ ഹൈക്കോടതിയിൽ ഉപഹർജി നൽകി. കേസിൽ തന്റെ ഭാഗം വീണ്ടും കേൾക്കാൻ അന്വേഷണസംഘത്തോട് നിർദ്ദേശിക്കണമെന്നാവശ്യപ്പെട്ടാണ് ഉപഹർജി നൽകിയത്. കേസുമായി ബന്ധപ്പെട്ട് ജൂൺ 30ന് മൊഴിയെടുത്തപ്പോൾ 20 ലക്ഷംരൂപ അക്കൗണ്ടിൽ ഇല്ലെന്ന് അന്വേഷണ ഉദ്യോഗസ്ഥൻ പുതിയ ആരോപണം ഉന്നയിച്ചിരുന്നു. പിന്നീടു നടത്തിയ പരിശോധനയിൽ ഇതു സ്ഥിരനിക്ഷേപമായി ഇട്ടിരുന്നതാണെന്നും എസ്.എൻ. ട്രസ്റ്റിന്റെ അക്കൗണ്ടിലേക്ക് പിന്നീടു മാറ്റിയിരുന്നെന്നും കണ്ടെത്തി. ഇക്കാര്യം ഉദ്യോഗസ്ഥനെ അറിയിച്ചെങ്കിലും വിശദീകരണം സ്വീകരിക്കാൻ തയ്യാറായില്ല. വിശദീകരണം കണക്കിലെടുക്കാതെ കേസിൽ അന്തിമറിപ്പോർട്ട് നൽകാനാണ് നീക്കമെന്നും തന്റെ വിശദീകരണം വീണ്ടും കേൾക്കാൻ നിർദേശിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്.