വൈപ്പിൻ: എസ്.എൻ.ഡി.പി യോഗം കണിച്ചുകുളങ്ങര യൂണിയൻ സെക്രട്ടറി കെ.കെ. മഹേശന്റെ ആത്മഹത്യയുടെ പേരിൽ യോഗത്തെയും യോഗ നേതൃത്വത്തെയും അപമാനിക്കുകയും ആക്ഷേപിക്കുകയും ചെയ്യുന്ന ഛിദ്രശക്തികളെ ഒറ്റപ്പെടുത്തുവാനും നേരിടുവാനും ജില്ലയിലെ യൂണിയുകളുടെ നേതൃയോഗം തീരുമാനിച്ചു. ഇന്നലെ വൈപ്പിൻ എസ്.എൻ.ഡി.പി യൂണിയൻ ഓഫീസിൽ കൊവിഡ് മാനദണ്ഡങ്ങൾ പാലിച്ചുചേർന്ന യോഗം യോഗം ജനറൽ സെക്രട്ടറി വെള്ളാപ്പള്ളി നടേശൻ വീഡിയോ കോൺഫറൻസിംഗിലൂടെ ഉദ്ഘാടനം ചെയ്തു. വൈസ് പ്രസിഡന്റ് തുഷാർ വെള്ളാപ്പള്ളി അദ്ധ്യക്ഷത വഹി​ച്ചു. വെള്ളാപ്പള്ളി നടേശന്റെ സംഘടനാ നേതൃത്വത്തിൽ യോഗം സമ്പൂർണ വിശ്വാസം രേഖപ്പെടുത്തി.

മഹേശൻ അഡ്മിനിസ്ട്രേറ്ററായ ചേർത്തല യൂണിയനിലെ മൈക്രോഫിനാൻസ് പദ്ധതി നടത്തിപ്പിൽ കോടികളുടെ തിരിമറികൾ കണ്ടെത്തിയിട്ടുണ്ട്. ഇക്കാര്യത്തിൽ ജൂൺ നാലിന് വിശദീകരണം ചോദിച്ചിരുന്നു. യൂണിയനിലെ 544-ാം നമ്പർ ശാഖയുടെയും അഡ്മി​നി​സ്ട്രേറ്ററായി​രുന്നു മഹേശൻ. ശാഖയുടെ കീഴി​ലെ ശ്രീകണ്ഠേശ്വരം സ്കൂളി​ൽ 14 അദ്ധ്യാപക നി​യമനങ്ങളും അഞ്ച് വർഷത്തെ അഡ്മി​ഷനുകളും നടത്തി​യത് അദ്ദേഹമാണ്. ഇതുമായി​ ബന്ധപ്പെട്ട വൻസാമ്പത്തി​ക ആരോപണങ്ങളെക്കുറി​ച്ച് എസ്.എൻ.ഡി​.പി​ യോഗം ചേർത്തല യൂണി​യൻ മേയ് 22ന് വി​ശദീകരണം തേടി​യി​രുന്നു.

ഇതി​ന്റെ പേരി​ലാണ് എസ്.എൻ.ഡി​.പി​ യോഗം ജനറൽ സെക്രട്ടറി​ വെള്ളാപ്പള്ളി​ നടേശനെ ബ്ളാക്ക്മെയി​ൽ ചെയ്യുന്ന രീതി​യി​ൽ അസത്യവി​വരണങ്ങൾ ഉൾക്കൊള്ളുന്ന ദീർഘമായ കത്ത് അദ്ദേഹത്തി​ന് സ്വകാര്യമായി​ നൽകി​യത്.

മൈക്രോ ഫി​നാൻസ് കോഓർഡി​നേറ്റർ എന്ന നി​ലയി​ലാണ് മാവേലി​ക്കര, ചെങ്ങന്നൂർ യൂണി​യനുകളി​ലെ മൈക്രോഫി​നാൻസ് ക്രമക്കേടുകൾ സംബന്ധി​ച്ച കേസി​ൽ മഹേശനെ ക്രൈംബ്രാഞ്ച് വി​ളി​ച്ചുവരുത്തി​യത്. ഇവർ മഹേശന്റെ സ്വത്തുവി​വരങ്ങളും ആവശ്യപ്പെട്ടതായാണ് സൂചന.

ഈ സമ്മർദങ്ങൾ മൂലം മാനസി​കമായി​ തകർന്ന് ആത്മഹത്യ ചെയ്യുകയായി​രുന്നു മഹേശൻ. വസ്തുതകളെ മറച്ചുവച്ച് ഈ ആത്മഹത്യയുടെ പേരി​ൽ എസ്.എൻ.ഡി​.പി​ യോഗത്തെയും അതി​ന്റെ അനി​ഷേധ്യനേതാവി​നെയും അപകീർത്തി​പ്പെടുത്താനുള്ള ശ്രമം സമുദായാംഗങ്ങൾ ഒറ്റക്കെട്ടായി​ ചെറുത്തുതോൽപ്പി​ക്കണമെന്നും യോഗം പാസാക്കി​യ പ്രമേയത്തി​ൽ പറയുന്നു. വൈപ്പി​ൻ യൂണി​യൻ സെക്രട്ടറി​ പി​.ഡി​. ശ്യാംദാസ് പ്രമേയം അവതരി​പ്പി​ച്ചു. എം.ബി.​ ശ്രീകുമാർ പ്രസംഗി​ച്ചു. ടി​.ജി​.വി​ജയൻ, ഷീബ ടീച്ചർ, ഡി​. ബാബു, എം.ഡി​. അഭി​ലാഷ്, സ്വാമി​നാഥൻ, കെ.പി​. കൃഷ്ണകുമാരി​ തുടങ്ങി​യവർ പങ്കെടുത്തു.