തോപ്പുംപടി: കൊവിഡ് കേസുകളെ തുടർന്ന് പശ്ചി​മകൊച്ചി​യുടെ ഭൂരി​ഭാഗം മേഖലകളും നി​ശ്ചലം. കുമ്പളങ്ങി, ചെല്ലാനം പഞ്ചായത്തുകളും​ ഫോർട്ടുകൊച്ചി, തോപ്പുംപടി, പാണ്ടിക്കുടി പ്രദേശങ്ങളും അടച്ചുപൂട്ടി​യ സ്ഥി​തി​യി​ലാണ്.

കുമ്പളങ്ങിയി​ൽ 5,9 വാർഡുകളിലാണ് രണ്ട് പേർക്ക് അസുഖം. നിരീക്ഷണത്തിൽ കഴിയേണ്ട 29കാരൻ മാർക്കറ്റുകളിലും, പൊതുസ്ഥലങ്ങളിലും, ബന്ധുവീടുകളിൽ സന്ദർശനം നടത്തിയതും ഇവി​ടെ ഭീതി​ പടർത്തുന്നു. ഇയാളുമായി സമ്പർക്കം പുലർത്തിയവരെ കണ്ടെത്താനുള്ള ശ്രമങ്ങളി​ലാണ് ആരോഗ്യവകുപ്പ്.

ചെല്ലാനത്ത് 307 വീടുകളിൽ 59 പേർക്ക് രോഗലക്ഷണം കണ്ടെത്തിയിട്ടുണ്ട്. 235 പേരുടെ സ്രവം പരിശോധനക്കയച്ചു.ചെല്ലാനം ആശുപത്രിയി​ലെ ആറ് ആരോഗ്യ പ്രവർത്തകർ സ്വയം നിരീക്ഷണത്തിൽ പോയി. ഗർഭിണിക്ക് കൊവിഡ് സ്ഥിരീകരിച്ചതോടെ എഴുപുന്ന - ചെല്ലാനം റോഡ് പൂർണ്ണമായും പൂട്ടി.

മരണം, ആശുപത്രി എന്നീ അത്യാവശ്യ കാര്യത്തിന് മാത്രമേ ഈ ഭാഗങ്ങളിൽ നിന്നും ജനങ്ങളെ അകത്തേക്കും പുറത്തേക്കും വിടുകയുള്ളൂ. വാഹനങ്ങളും കടത്തിവിടുന്നില്ല. ചെല്ലാനത്ത് രോഗി​കൾ 14 പേരുണ്ട്. പതിനഞ്ചാം വാർഡിലാണ് സ്ഥിതി ഗുരുതരം. അടച്ചു പൂട്ടിയ സ്ഥലങ്ങളിൽ പാൽ, പത്രം, പാചക വിതരണ ഗ്യാസ് എന്നിവയ്ക്കും വിലക്കുണ്ട്.