കൊച്ചി : കൊവിഡ് വ്യാപന പശ്ചാത്തലത്തിൽ പിറവം നഗരസഭയിലെ നിർദ്ധനരോഗികൾക്കായി ഹെൽത്ത് കിറ്റുകൾ വിതരണം ചെയ്യും. ജില്ലാ ഭരണകൂടവും ബി.പി.സി.എല്ലും സംയുക്തമായാണ് പദ്ധതി നടപ്പിലാക്കുന്നത്. ഹെൽത്ത് കിറ്റുകളുടെ വിതരണോദ്ഘാടനം ജില്ലാ കളക്ടർ എസ്. സുഹാസ് കളക്ട്രേറ്റിൽ നിർവഹിച്ചു. പിറവം നഗരസഭാ പരിധിയിൽ ക്യാൻസർ, ഹൃദ്രോഗം, വൃക്കരോഗം ബാധിച്ചവർ സാനിറ്റൈസർ, മാസ്‌ക്, അവശ്യമരുന്നുകൾ, ആരോഗ്യപാനീയങ്ങൾ, പാൽപ്പൊടി എന്നിവ അടങ്ങിയ കിറ്റാണ് കൈമാറുക.പദ്ധതിക്കായി ബി.പി.സി.എല്ലിന്റെ സി.എസ്.ആർ ഫണ്ടിൽ നിന്നും 5.12 ലക്ഷം രൂപ നൽകി. ജില്ലാ ഭരണകൂടം ആരോഗ്യപാനീയവും പാൽപ്പൊടി പായ്ക്കറ്റുകളും ഇതോടൊപ്പം ലഭ്യമാക്കി. ഉദ്ഘാടന ചടങ്ങിൽ പിറവം നഗരസഭാ ചെയർമാൻ സാബു കെ. ജേക്കബ്, സെക്രട്ടറി എം. മുഹമ്മദ് ആരിഫ്ഖാൻ, ബി.പി.സി.എൽ പ്രതിനിധി വിനീത് എം. വർഗീസ് എന്നിവർ പങ്കെടുത്തു.