തൃക്കാക്കര : തൃക്കാക്കര നഗര സഭയിൽ കൈയ്യേറ്റക്കാർക്കായി ഇടതുപക്ഷവും-വലതുപക്ഷവും ഒന്നായി​.
നഗരസഭയിലെ വഴിയോരക്കച്ചവടക്കാരി​ൽ 2018 മാർച്ച് 31 ന് മുമ്പ് അപേക്ഷിച്ച വരെ മാത്രമേ അംഗീകൃത ലിസ്റ്റിൽ ഉൾപ്പെടുത്താവൂ എന്ന‌ കൗൺസിൽ മുൻ തീരുമാനം ഇടതുപക്ഷവും-വലതുപക്ഷവും ഒന്നുചേർന്ന് വീണ്ടും അട്ടിമറിച്ചു.
ഇന്നലെ അധ്യക്ഷ ഉഷ പ്രവീണിൻെറ അധ്യക്ഷതയിൽ ചേർന്ന യോഗത്തിലാണ് പുതിയ 45 പേരെ കൂടി പട്ടി​കയി​ൽ ​ ഉൾപ്പെടുത്തി​യത്.നിലവിൽ 128 പേരായിരുന്നു ലിസ്റ്റിൽ ഉണ്ടായിരുന്നത്.
ഓരോ വാർഡ് കൗൺസിലർമാരും പുതിയ പുതിയ പേരുകൾ ഉൾപ്പെടുത്തണമെന്നാവശ്യവുമായി രംഗത്തെത്തി. ചെമ്പുമുക്ക് -പടമുകൾ -സീപോർട്ട് എയർ പോർട്ട് റോഡ്, ഐ.എം.ജി, കളക്ടറേറ്റ് ജംഗ്ഷനുകൾ തുടങ്ങിയ പ്രദേശങ്ങളിൽ പൊതുസ്ഥലം കൈയേറി​ കച്ചവടം തുടങ്ങി​യവരെ പട്ടി​കയി​ൽ പെടുത്താനാണ് ശ്രമം.
ജില്ലാ ആസ്ഥാനമായ തൃക്കാക്കരയുടെ പ്രധാന റോഡുകളെല്ലാം ഇന്ന് കൈയ്യേറ്റക്കാരുടെ പിടിയിലാണ്. റോഡ് കൈയ്യേറി ദിവസ വാടകക്ക് കൊടുക്കുന്നവർക്കുവേണ്ടിയും കൗൺസിലർമാർ വാദിക്കുന്നുണ്ട്.