കോലഞ്ചേരി: കൊവിഡ് പ്രതിരോധ മാനദണ്ഡം ലംഘിച്ചതിന് യു.ഡി.എഫ് കൺവീനർ ബെന്നി ബഹനാൻ എം.പിക്കും കുന്നത്തുനാട് എം.എൽ.എ വി.പി സജീന്ദ്രനുമെതിരെ പൊലീസ് കേസെടുത്തു. എറണാകുളം കുന്നത്തുനാട്ടിലെ മഴുവന്നൂർ പഞ്ചായത്തോഫീസ് ഉദ്ഘാടനത്തോടനുബന്ധിച്ച് നടന്ന ചടങ്ങിൽ പങ്കെടുത്ത എം.പി, എം.എൽ.എ, പഞ്ചായത്ത് പ്രസിഡന്റ് അമ്മുക്കുട്ടി സുദർശനൻ, വൈസ് പ്രസിഡന്റ് അനു.ഇ.വർഗീസ്, ഡി.സി.സി സെക്രട്ടറി എം.ടി. ജോയി, കോൺഗ്രസ് മണ്ഡലം പ്രസിഡന്റ് കെ.വി. എൽദോ എന്നിവരടക്കം 18 പേർക്കെതിരെയാണ് കുന്നത്തുനാട് പൊലീസ് കേസെടുത്തത്. ഇന്നലെ രാവിലെ നടന്ന പരിപാടിയിൽ നൂറിലധികം പേർ പങ്കെടുത്തതായി കണ്ടെത്തിയിട്ടുണ്ട്. സി.പി.എം ജില്ലാ കമ്മിറ്റിയംഗം അഡ്വ. കെ.എസ്.അരുൺകുമാർ നൽകിയ പരാതിയിലാണ് നടപടി. യോഗത്തിൽ പങ്കെടുത്ത മുഴുവൻ പേരെയും കണ്ടെത്താൻ അന്വേഷണം തുടങ്ങിയിട്ടുണ്ട്.