കോലഞ്ചേരി: എൽ.എസ്.എസ് സ്‌കോളർഷിപ്പ് പരീക്ഷയിൽ ആലുവ വിദ്യാഭ്യാസ ജില്ലയിൽ കോലഞ്ചേരി വിദ്യാഭ്യാസ ഉപജില്ല ഒന്നാമതായി. 136 കുട്ടികൾക്കാണ് ഇത്തവണ സ്‌കോളർഷിപ്പ് ലഭിച്ചത്. കഴിഞ്ഞ അദ്ധ്യയനവർഷം 56 എണ്ണമായിരുന്നു. ഇത് ഉപജില്ലയുടെ ചരിത്ര നേട്ടമാണെന്ന് ഉപജില്ലാ ഓഫീസർ കെ. അബ്ദുൾ സലാം പറഞ്ഞു.
പൊതുവിദ്യാലയങ്ങളിലെ നാലാംക്ലാസിൽ പഠനപ്രവർത്തനങ്ങളിൽ മികവ് പ്രകടിപ്പിക്കുന്ന കുട്ടികളെ കണ്ടെത്തുന്നതിനു വേണ്ടി സർക്കാർ നടത്തുന്ന ഏറ്റവും വലിയ സ്‌കോളർഷിപ്പ് പരീക്ഷയാണിത്. ജേതാവിന് 1,000 രൂപയുടെ സ്‌കോളർഷിപ്പ് ലഭിക്കും.
എറണാകുളം ഡയറ്റിന്റെ നേതൃത്വത്തിൽ ജില്ലയിൽ നടപ്പാക്കിയ ലിറ്റിൽ സ്‌കോളേഴ്‌സ് പദ്ധതിയും വിദ്യാലയങ്ങളിൽ അദ്ധ്യാപകരും പി.ടി.എയും നേതൃത്വം നൽകി നടത്തിയ പരിശീലനവും കോലഞ്ചേരി, വടവുകോട്, വെണ്ണിക്കുളം എന്നിവിടങ്ങളിൽ അവധിദിനങ്ങളിലും ശനിയാഴ്ചകളിലും നടത്തിയ പ്രത്യേക പരിശീലനങ്ങളും ടീച്ചേഴ്‌സ് ക്ലബ്, കെ.എസ്.ടി.എ , കെ.പി.എസ്.ടി.എ തുടങ്ങിയ അദ്ധ്യാപക സംഘടനകൾ നടത്തിയ മാതൃകാ പരീക്ഷകളും കോലഞ്ചേരിയിലെ മികച്ച വിജയത്തിന് വഴിയൊരുക്കി.
ഡയറ്റ് ഫാക്കൽറ്റി അംഗങ്ങളായ എം.എൻ. ജയ, നിഷ പന്താവൂർ, എ.ഇ.ഒ കെ.അബ്ദുൾ സലാം, ബ്ലോക്ക് പ്രോഗ്രാം കോ ഓർഡിനേറ്റർ ടി. രമാഭായി, ടീച്ചേഴ്‌സ് ക്ലബ് അക്കാദമിക് കോ ഓർഡിനേറ്റർ കെ.വി. എൽദോ, അദ്ധ്യാപകരായ ടി.ടി. പൗലോസ്, അനിത തോമസ്, ലീല പോൾ, ടി.എസ്. അനുഷ എന്നിവർ പരിശീലനങ്ങൾക്ക് നേതൃത്വം നൽകി