മൂവാറ്റുപുഴ: മൈലാടി മലയിലെ കൂറ്റൻ ശുദ്ധ ജലസംഭരണി തകർന്നു. പ്രദേശത്തെ കുടിവെള്ള വിതരണം നിലച്ചു. നൂറു കണക്കിന് കുടുംബങ്ങൾക്ക് ശുദ്ധജലം വിതരണം നടത്തുന്ന മൂവാറ്റുപുഴ നഗരസഭയിലെ 18-ാം വാർഡിൽ സ്ഥിതിചെയ്യുന്ന മൈലാടിമല കുടിവെള്ള പദ്ധതിയുടെ ജലസംഭരണി ഇന്നലെ പുലർച്ചെ വെളളം പമ്പ് ചെയ്യുന്നതിനിടെയാണ് തകർന്നത്. ഏഴ് വർഷം മുമ്പ് മുൻഎം.എൽ.എ ജോസഫ് വാഴക്കന്റെ ആസ്ഥി വികസന ഫണ്ട് ഉപയോഗിച്ച് സ്ഥാപിച്ച ടാങ്കാണ് തകർന്നത്. 10,000 ലിറ്റർ സംഭരണ ശേഷിയുള്ള ടാങ്കിൽ നിന്നും നഗരസഭയിലെ ഉയർന്ന പ്രദേശങ്ങളിലൊന്നായ മയിലാടി മലയിലെ 100 കണക്കിന് കുടുംബങ്ങൾക്ക് ശുദ്ധജല വിതരണം നടത്തുന്ന പദ്ധതിയുടെ ടാങ്ക് തകർന്നതോടെ പ്രദേശത്ത് കുടിവെളള വിതരണവും നിലച്ചു. സംഭവമറിഞ്ഞ് സ്ഥലത്തെത്തിയ എൽദോ എബ്രഹാം എം.എൽ.എ വിഷയത്തിൽ അടിയന്തിര ഇടപെടൽ നടത്താൻ വാട്ടർ അതോറിറ്റി ഉദ്യോഗസ്ഥർക്ക് നിർദ്ദേശം നൽകി.

താത്കാലിക ടാങ്ക് സ്ഥാപിക്കും

ഇന്ന് താത്കാലികമായി ടാങ്ക് സ്ഥാപിച്ച് കുടിവെളള വിതരണം പുനസ്ഥാപിക്കാൻ വാട്ടർ അതോറിറ്റി ഉദ്യോഗസ്ഥരോട് എം.എൽ.എ നിർദ്ദേശിച്ചു.

പുതിയ ടാങ്ക് സ്ഥാപിക്കും

പുതിയ 10,000-ലിറ്റർ ടാങ്ക് സ്ഥാപിക്കാൻ എം.എൽ.എയുടെ ആസ്ഥി വികസന ഫണ്ടിൽ നിന്നും തുക അനുവദിക്കുമെന്ന് എൽദോ എബ്രഹാം എം.എൽ.എ പറഞ്ഞു. എം.എൽ.എയോടൊപ്പം കൗൺസിലർമാരായ ജിനു ആന്റണി, കെ.ബി.ബിനീഷ്‌കുമാർ, നേതാക്കളായ പി.എം.ഇബ്രാഹിം, കെ.എ.സനീർ, ജോസുകുട്ടി ഒഴുകയിൽ, വാട്ടർ അതോറിറ്റി ഉദ്യോഗസ്ഥർ പങ്കെടുത്തു.