കൊച്ചി: കൊവിഡും ലോക്ക്ഡൗണും സമ്പദ്‌മേഖലയെ ഉലച്ചതോടെ,​ സുരക്ഷിത നിക്ഷേപമെന്ന നിലയിൽ സ്വർണത്തിലേക്കുള്ള പണമൊഴുക്ക് ശക്തമായി. 2020 ജനുവരി-ജൂൺ കാലയളവിൽ സ്വർണ എക്‌സ്‌ചേഞ്ച് ട്രേഡഡ് ഫണ്ടുകളിൽ (ഗോൾഡ് ഇ.ടി.എഫ്)​ എത്തിയ നിക്ഷേപം 3,​530 കോടി രൂപയാണെന്ന് അസോസിയേഷൻ ഒഫ് മ്യൂച്വൽ ഫണ്ട്‌സ് ഇൻ ഇന്ത്യ (ആംഫി)​ വ്യക്തമാക്കി. 2019ലെ സമാനകാലയളവിൽ 160 കോടി രൂപയുടെ നിക്ഷേപ നഷ്‌ടമാണ് ഗോൾഡ് ഇ.ടി.എഫുകൾ നേരിട്ടത്.

ഗോൾഡ് ഇ.ടി.എഫ് കമ്പനികൾ കൈകാര്യം ചെയ്യുന്ന മൊത്തം ആസ്‌തി (അസറ്റ് അണ്ടർ മാനേജ്‌മെന്റ് - എ.യു.എം)​ ജൂണിലെ കണക്കുപ്രകാരം 10,​857 കോടി രൂപയാണ്. 2019 ജൂണിൽ എ.യു.എം 4,​930 കോടി രൂപയായിരുന്നു. ലോക്ക്ഡൗണിന് ശേഷം ഇ.ടി.എപുകളിലേക്കുള്ള നിക്ഷേപത്തിൽ മികച്ച ഉണർവുണ്ട്. ജനുവരിയിൽ ലഭിച്ച നിക്ഷേപം 202 കോടി രൂപയായിരുന്നു. ഫെബ്രുവരിയിൽ 1,​483 കോടി രൂപ ലഭിച്ചു. മാർച്ചിൽ നേരിട്ടത് 195 കോടി രൂപയുടെ നഷ്‌ടം. ഏപ്രിലിൽ 731 കോടി രൂപയായും മേയിൽ 815 കോടി രൂപയായും നിക്ഷേപം ഉയർന്നു. 494 കോടി രൂപയാണ് ജൂണിൽ കിട്ടിയത്.