ന്യൂഡൽഹി: കൊവിഡ് പ്രതിസന്ധി മൂലം ഇന്ത്യയിൽ സാമ്പത്തിക പ്രവർത്തനങ്ങൾ മന്ദഗതിയിൽ തുടരുമെന്നും നടപ്പു സാമ്പത്തിക വർഷം (2020-21)​ മൊത്ത ആഭ്യന്തര ഉത്‌പാദന (ജി.ഡി.പി)​ വളർച്ച നെഗറ്രീവ് 6.1 ശതമാനം വരെ ഇടിഞ്ഞേക്കുമെന്നും പ്രമുഖ ജാപ്പനീസ് ബ്രോക്കറേജ് സ്ഥാപനമായ നോമുറ അഭിപ്രായപ്പെട്ടു. കൊവിഡും ലോക്ക്ഡൗണും മൂലം ഉത്‌പന്ന-സേവനങ്ങളുടെ വിതരണവും ഉപഭോക്തൃ ഡിമാൻഡും കുത്തനെ ഇടിഞ്ഞിട്ടുണ്ട്.

നടപ്പുവർഷത്തെ ആദ്യപാദമായ ഏപ്രിൽ-ജൂണിൽ ജി.ഡി.പി നെഗറ്റീവ് 15.2 ശതമാനമായിരിക്കും. സെപ്‌തംബർ പാദത്തിൽ നെഗറ്രീവ് 5.6 ശതമാനം,​ ഡിസംബർ പാദത്തിൽ നെഗറ്റീവ് 2.8 ശതമാനം,​ മാർച്ച്പാദത്തിൽ നെഗ‌റ്രീവ് 1.4 ശതമാനം എന്നിങ്ങനെയും പ്രതീക്ഷിക്കുന്നു. ആഗസ്‌റ്രിലെ ധനനയ നിർണയ യോഗത്തിൽ റിസർവ് ബാങ്ക് മുഖ്യ പലിശ നിരക്കുകൾ നിലനിറുത്താനാണ് സാദ്ധ്യത. അതേസമയം,​ ഒക്‌ടോബറിലും ഡിസംബറിലും റിപ്പോ നിരക്ക് കാൽ ശതമാനം വീതം കുറച്ചേക്കുമെന്നും നോമുറ വിലയിരുത്തുന്നു. കൊവിഡ് പശ്ചാത്തലത്തിൽ ഈവർഷം ഇതുവരെ റിസർവ് ബാങ്ക് റിപ്പോ നിരക്ക് 1.15 ശതമാനം കുറച്ചിട്ടുണ്ട്.