അടിമാലി: കൊവിഡ് പ്രതിരോധ പ്രവർത്തനങ്ങളുടെ ഭാഗമായി അടിമാലി പഞ്ചായത്തിൽ ഫസ്റ്റ് ലൈൻ ട്രീറ്റ്‌മെന്റ് സെന്റിറിനുള്ള ഒരുക്കങ്ങൾ പൂർത്തിയായി. പതിനാലാം മൈൽ, ഇരുമ്പുപാലം എന്നിവിടങ്ങളിലാണ് ട്രീറ്റ്‌മെന്റ് സെന്റർ ആരംഭിക്കുന്നത്. പതിനാലാം മൈലിലെ മൂന്നാർവാലി ടൂറിസ്റ്റ് ഹോമാണ് ട്രീറ്റ്‌മെന്റ് സെന്ററിനായി പഞ്ചായത്ത് കണ്ടെത്തിയിട്ടുള്ളത്. കൂടുതലായി കൊവിഡ് കേസുകൾ റിപ്പോർട്ട് ചെയ്യുന്നതനുസരിച്ച് ഇരുമ്പുപാലത്തെ ട്രൈബൽ ഹോസ്റ്റലും ക്രമീകരിക്കും. ആകെ 400 പേർക്കുള്ള സൗകര്യമാണ് ഒരുക്കുന്നതെന്ന് പഞ്ചായത്ത് സെക്രട്ടറി കെ.എൻ. സഹജൻ പറഞ്ഞു. 320 പേർക്കുള്ള ക്രമീരണമാണ് ആദ്യഘട്ടത്തിൽ പൂർത്തിയാക്കിയിട്ടുള്ളത്. കേസുകൾ റിപ്പോർട്ട് ചെയ്യുന്ന സാഹചര്യത്തിലാകും 80 പേർക്കുള്ള ക്രമീകരണങ്ങൾ കൂടി ഒരുക്കുക. പുതുതായി പഞ്ചായത്തിൽ റിപ്പോർട്ട് ചെയ്യുന്ന കൊവിഡ് രോഗികളെ ഇനി മുതൽ പതിനാലാംമൈലിലെ ട്രീറ്റ്‌മെന്റ് സെന്ററിൽ എത്തിച്ചാണ് ചികിത്സ നൽകുക. സന്നദ്ധ സേവന പ്രവർത്തകരും വിവിധ രാഷ്ട്രീയ പാർട്ടി പ്രതിനിധികളും സംഘടന ഭാരവാഹികളും ചികിത്സ കേന്ദ്രത്തിന്റെ സജജീകരണ ജോലികളിൽ പങ്കെടുത്തു.

എല്ലാ സൗകര്യങ്ങളും

റിസപ്ഷൻ, വെയിറ്റിംഗ് ഏരിയ, രജിസ്‌ട്രേഷൻ ഏരിയ, കൺസൾട്ടിംഗ് റൂം, ഒബ്സർവേഷൻ റൂം, ടെലി മെഡിസിൻ സൗകര്യം, ഫാർമസി, ഭക്ഷണം, കുടിവെള്ളം,ടോയ്ലറ്റ് എന്നിങ്ങനെ എല്ലാ അടിസ്ഥാന സൗകര്യങ്ങളും ഒരുക്കിയിട്ടുണ്ട്.