കാസർകോട് കൊവിഡ് ഭേദമായ യുവാവിന് വീണ്ടും കൊവിഡ് ബാധിച്ചു. ജൂൺ 20 ന് ദുബായിൽ നിന്നെത്തിയ ഉദുമ മുക്കുന്നോത്ത് സ്വദേശിയായ 42 വയസായ യുവാവിനാണ് വീണ്ടും കൊവിഡ് സ്ഥിരീകരിച്ചത്. ദുബായിൽ നിന്ന് കൊവിഡ് ബാധിച്ച 42 കാരന് നാട്ടിലേക്ക് വരുന്നതിന് ഏതാനും ദിവസം മുമ്പാണ് രോഗം ഭേദമായത്. നാട്ടിലെത്തി വീണ്ടും സ്രവം എടുക്കുമ്പോൾ ദുബായിൽ വച്ച് പോസിറ്റീവ് ആയിരുന്ന കാര്യം ആരോഗ്യ പ്രവർത്തകരോട് പറഞ്ഞിരുന്നു. എന്നാൽ ഇതിന്റെ സർട്ടിഫിക്കറ്റ് ഒന്നും ഇയാളുടെ പക്കൽ ഉണ്ടായിരുന്നില്ല. സ്രവപരിശോധനാഫലം വന്നപ്പോൾ വീണ്ടും പോസിറ്റീവായതായി കണ്ടെത്തുകയായിരുന്നു. നേരത്തെയും ഗൾഫിൽ നിന്ന് രോഗം ഭേദമായി കാസർകോട് എത്തിയ രണ്ട് പേർക്ക് വീണ്ടും കൊവിഡ് പോസിറ്റീവ് ആയിട്ടുണ്ടെന്ന് ഡി എം ഒ ഓഫീസ് വൃത്തങ്ങൾ പറഞ്ഞു.