കാസർകോട്: പൊലീസ് പിന്തുടരുന്നതിനിടെ നിയന്ത്രണം വിട്ട് റോഡിലേക്ക് മറിഞ്ഞ കാറിൽ നിന്ന് പത്ത് കിലോ കഞ്ചാവ് കണ്ടെടുത്തു. വിൽപ്പനക്കാരൻ പൊലീസെത്തും മുമ്പെ ഓടി രക്ഷപ്പെട്ടു. ചൊവ്വാഴ്ച ഉച്ചക്ക് 12 മണിയോടെ ഹൊസങ്കടി ബട്ടിപ്പദവിലാണ് കഞ്ചാവ് കടത്തിനിടെ സ്വിഫ്റ്റ് കാർ അപകടത്തിൽ പെട്ടത്.

കാറിൽ കഞ്ചാവ് കടത്തുന്നതായി മഞ്ചേശ്വരം അഡീഷണൽ എസ്.ഐ ബാലചന്ദ്രന് രഹസ്യവിവരം ലഭിച്ചിരുന്നു. ഇതേ തുടർന്ന് എസ്.ഐയുടെ നേതൃത്വത്തിലുള്ള പൊലീസ് സംഘം കാറിനെ പിന്തുടരുകയായിരുന്നു. റോഡിൽ മറിഞ്ഞ് കിടക്കുകയായിരുന്ന കാർ പൊലീസ് പരിശോധിച്ചപ്പോൾ ചാക്കുകളിൽ സൂക്ഷിച്ച നിലയിൽ 10 കിലോ കഞ്ചാവ് കണ്ടെത്തുകയായിരുന്നു. കഞ്ചാവും കാറും പൊലീസ് കസ്റ്റഡിയിലെടുത്തു. രക്ഷപ്പെട്ടയാളെ പിടികൂടാൻ അന്വേഷണം ഊർജിതമാക്കിയിട്ടുണ്ടെന്ന് പൊലീസ് പറഞ്ഞു.