കോഴിക്കോട്: വീട്ടിൽ വീണ് എല്ലൊടിഞ്ഞ വൃദ്ധയ്‌ക്ക് ചികിത്സയും സംരക്ഷണവും നൽകാത്ത സംഭവത്തിൽ വയോജന സംരക്ഷണ നിയമത്തിന്റെ അടിസ്ഥാനത്തിൽ ആർ.ഡി.ഒ നടപടിയെടുക്കണമെന്ന് സംസ്ഥാന മനുഷ്യാവകാശ കമ്മീഷൻ ആവശ്യപ്പെട്ടു. കോഴിക്കോട് മടവൂർ സ്വദേശിനി കദീജയുടെ (75) ദുരവസ്ഥയെ കുറിച്ച് അന്വേഷിക്കാനാണ് കമ്മീഷൻ ജുഡിഷ്യൽ അംഗം പി. മോഹനദാസാണ് ഉത്തരവിട്ടത്.

കദീജയുടെ മക്കൾ വിദേശത്താണ്. മരുമകൾക്കൊപ്പമാണ് താമസിക്കുന്നത്. കഴിഞ്ഞ 29ന് വീണ് പരിക്കേറ്റ കദീജക്ക് വിദഗ്ദ്ധ ചികിത്സ നൽകാൻ മരുമകൾ തയ്യാറായില്ല. നാട്ടുകാരാണ് അവരെ ആശുപത്രിയിലെത്തിച്ചത്. എന്നാൽ ആശുപത്രിയിൽ കൂട്ടിരിക്കാൻ ആരും ഉണ്ടായിരുന്നില്ല. ആർ.ഡി.ഒ അടിയന്തരമായി വിഷയത്തിൽ ഇടപെടണമെന്നും 30 ദിവസത്തിനകം റിപ്പോർട്ട് സമർപ്പിക്കണമെന്നും കമ്മിഷൻ ആവശ്യപ്പെട്ടു.