കുന്ദമംഗലം: കൊവിഡ് വ്യാപിക്കുന്ന സാഹചര്യത്തിൽ പെരുന്നാൾ കാലത്തെ ബലി നടത്തേണ്ടതില്ലെന്ന് കോഴിക്കോട് പാളയം ജുമാ മസ്ജിദ് ചീഫ് ഇമാം ഹുസൈൻ മടവൂർ പറഞ്ഞു. ബലി നബിചര്യയിൽ പെട്ടതാണെങ്കിലും സർക്കാരും ആരോഗ്യ കേന്ദ്രങ്ങളും നൽകുന്ന നിർദ്ദേശങ്ങൾ പാലിക്കാൻ കഴിയാത്തവർ ബലി ഒഴിവാക്കണമെന്നും ഓൺലൈനായി നടത്തിയ വെള്ളിയാഴ്ച പ്രഭാഷണത്തിൽ അദ്ദേഹം അഭ്യർത്ഥിച്ചു. ബലി നടത്തുമ്പോൾ ആരോഗ്യ നിയമങ്ങൾ പാലിക്കേണ്ടതുണ്ട്. അത് പാലിക്കാൻ കഴിയുന്നവർ ബലി ചെയ്യണം. പണിയും കൂലിയുമില്ലാതെ അയൽപക്കത്ത് ദാരിദ്ര്യം ഉള്ളപ്പോൾ അവർക്ക് ഭക്ഷണം നൽകലാണ് ബലിയെക്കാളും ഇപ്പോൾ പുണ്യമെന്നും അദ്ദേഹം വിശദീകരിച്ചു.