കോഴിക്കോട്: വാതിൽ തുറക്കാനാവാതെ മണിക്കൂറുകളോളം ഫ്ലാറ്റിന്റെ 13ാം നിലയിലെ ബാൽക്കണിയിൽ കുടുങ്ങിയ ക്വാറന്റൈനിൽ കഴിയുന്നയാളെ അഗ്നിശമന സേന രക്ഷിച്ചു. കോർപ്പറേഷൻ ഓഫീസിന് സമീപത്തെ കോക്‌സ് വെയിൻ അപ്പാർട്ടിമെന്റിൽ താമസിക്കുന്ന പാനൂർ സ്വദേശിയെയാണ് ഇന്നലെ വൈകീട്ട് നാലോടെ രക്ഷിച്ചത്. ഫ്ലാറ്റിലെ സെക്യൂരിറ്റി ജീവനക്കാരനാണ് ബീച്ച് അഗ്നിശമന യൂണിറ്റിനെ വിവരമറിയിച്ചത്. മുൻവാതിലിന്റെ പൂട്ട് പൊളിച്ച് അകത്ത് കടന്ന സേനാംഗങ്ങൾ ബാൽക്കണിയിലേക്കുള്ള വാതിൽ തുറന്നാണ് ഇയാളെ രക്ഷിച്ചത്. സ്റ്റേഷൻ ഓഫീസർ ടി.സതീഷ്, അസി.സ്റ്റേഷൻ ഓഫീസർ കെ. ജയകുമാർ, സീനിയർ ഫയർ ആന്റ് റസ്‌ക്യൂ ഓഫീസർ വി.പി. അജയൻ, ഓഫീസർമാരായ ടി. ബാബു, എം.വി. അരുൺ, വി.ബി. സനൽരാജ്, കെ. അജീഷ്, എം.കെ. രജീഷ്, ഹോംഗാർഡുമാരായ ടി. ലോഹിതാക്ഷൻ, കെ. ഉണ്ണികൃഷ്ണൻ എന്നിവർ സംഘത്തിലുണ്ടായിരുന്നു.