കുന്ദമംഗലം: പതിമംഗലത്ത് ക്വാറന്റൈൻ ലംഘിച്ച രണ്ടുപേരെ അധികൃതർ ക്വാറന്റൈൻ സെന്ററിലേക്ക് മാറ്റി. ഈ മാസം14ന് ഗോവയിൽ നിന്ന് മടങ്ങിയെത്തിയ ലോറി തൊഴിലാളികളായ പതിമംഗലം സ്വദേശിയേയും ആലപ്പുഴ സ്വദേശിയേയുമാണ് ആരോഗ്യ വകുപ്പിന്റ് നിർദ്ദേശത്തെ തുടർന്ന് കുന്ദമംഗലം പൊലീസ് മർകസിൽ പ്രവർത്തിക്കുന്ന ക്വാറന്റൈൻ സെന്ററിലേക്ക് മാറ്റിയത്. ഗോവയിൽ നിന്ന് മടങ്ങിയെത്തിയ ഇവർ ലോറി വർക്ക്ഷോപ്പിൽ നിർത്തിയിട്ട് അങ്ങാടിയിൽ കറങ്ങി നടക്കുന്നത് ശ്രദ്ധയിൽപ്പെട്ട നാട്ടുകാരാണ് ആരോഗ്യ വകുപ്പിൽ വിവരം അറിയിച്ചത്. തുടർന്ന് നടത്തിയ അന്വേഷണത്തിലാണ് പതിമംഗലം സ്വദേശിയോടൊപ്പം ആലപ്പുഴ സ്വദേശിയുമുണ്ടെന്ന് കണ്ടെത്തിയത്. അന്യ സംസ്ഥാനത്ത് നിന്നെത്തിയ ഇവർ ആരോഗ്യ വകുപ്പിനെ വിവരമറിയിക്കാതെയാണ് പതിമംഗലത്ത് താമസിച്ചിരുന്നത്.