കോഴിക്കോട്: കോഴിക്കോട് വുഡ്‌ലാഡ് ജംഗ്ഷനിലെ ലിവ ബുക്സിന്റെ ഷട്ടർ പൊളിച്ച് മോഷണം നടത്തിയ പ്രതിയെ കോഴിക്കോട് സിറ്റി ഡി.സി.പി സുജിത്ത് ദാസിന്റെ നേതൃത്വത്തിലുള്ള പ്രത്യേക അന്വേഷണ സംഘവും കസബ പൊലീസും പിടികൂടി.

ഈരാറ്റുപേട്ട മംഗലാംകുന്ന് കോളനി ഷാജി എന്ന ഭദ്രാവതി ഷാജി (56) ആണ് പിടിയിലായത്. പൊലീസിനെ ആക്രമിച്ചതുൾപ്പെടെ നിരവധി കേസുകളിൽ പ്രതിയാണ് ഷാജി.സഞ്ചി തൂക്കി വീടുവീടാന്തരം കയറി പഴയ സാധനങ്ങൾ എടുക്കാനെന്ന വ്യാജേന വീടുകൾ കണ്ടെത്തി രാത്രി മോഷണം നടത്തുന്നതാണ് പതിവ്.

ലോക്ക് ഡൗണിൽ കടകൾ നേരത്തെ അടക്കുന്നത് മുതലാക്കിയാണ് ഷാജി കമ്പി പാര ഉപയോഗിച്ച് ഷട്ടർ പൊളിക്കുന്നതിലേക്ക് ശ്രദ്ധ തിരിച്ചത്. പിടിക്കാനായി ആരെങ്കിലും അടുത്ത് വരുമ്പോൾ കൈയിലുള്ള ഇരുമ്പ് പാര ഉപയോഗിച്ച് ആക്രമിച്ച് രക്ഷപ്പെടും. അക്രമകാരിയായ ഷാജിയെ പ്രത്യേക അന്വേഷണ സംഘവും കസബ പൊലീസ് ഇൻസ്‌പെക്ടർ എം.പ്രജീഷിന്റെ നേതൃത്വത്തിലുള്ള പൊലീസും ചേർന്ന് കീഴ്‌പ്പെടുത്തുകയായിരുന്നു. പ്രതി സ്ഥിരമായി പൂട്ടുപൊളിക്കാനുപയോഗിക്കുന്ന ഇരുമ്പ് പാരയും മോഷണ മുതലുകളും പൊലീസ് കണ്ടെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.