കോട്ടയം: ജില്ലയിൽ ഇന്നലെ നാലു പേർക്ക് കൂടി കൊവിഡ് സ്ഥിരീകരിച്ചു. ഡൽഹിയിൽനിന്ന് ജൂൺ 15ന് എത്തി പത്തനംതിട്ട ജില്ലയിലെ കുന്നന്താനത്ത് നിരീക്ഷണ കേന്ദ്രത്തിൽ കഴിഞ്ഞിരുന്ന പായിപ്പാട് സ്വദേശി (29), കുവൈറ്റിൽനിന്ന് ജൂൺ 16ന് എത്തി ഹോം ക്വാറന്റൈനിൽ കഴിഞ്ഞിരുന്ന പൂഞ്ഞാർ സ്വദേശി (25), മുബയിൽനിന്ന് ജൂൺ 20ന് എത്തി തെങ്ങണയിലെ ക്വാറന്റൈൻ കേന്ദ്രത്തിൽ കഴിഞ്ഞിരുന്ന പായിപ്പാട് സ്വദേശി (22), ഡൽഹിയിൽനിന്ന് ജൂൺ 20ന് എത്തി ചങ്ങനാശേരിയിലെ ക്വാറന്റൈൻ കേന്ദ്രത്തിൽ കഴിഞ്ഞിരുന്ന വാകത്താനം സ്വദേശിനി (29) എന്നിവർക്കാണ് രോഗം ബാധിച്ചത്.

കോട്ടയം ജില്ലക്കാരായ 107 പേരാണ് ഇപ്പോൾ ചികിത്സയിലുള്ളത്. ഇതിൽ 40 പേർ പാലാ ജനറൽ ആശുപത്രിയിലും 34 പേർ കോട്ടയം മെഡിക്കൽ കോളേജ് ആശുപത്രിയിലും 28 പേർ കോട്ടയം ജനറൽ ആശുപത്രിയിലും മൂന്നു പേർ എറണാകുളം മെഡിക്കൽ കോളേജ് ആശുപത്രിയിലും രണ്ടു പേർ മഞ്ചേരി മെഡിക്കൽ കോളേജ് ആശുപത്രിയിലുമാണ്. ജില്ലയിൽ ചികിത്സയിൽ കഴിഞ്ഞിരുന്ന ആറു പേർ ഭേദമായതിനെത്തുടർന്ന് ആശുപത്രി വിട്ടു. പാലാ ജനറൽ ആശുപത്രിയിൽനിന്നാണ് ഇവരെ ഡിസ്ചാർജ് ചെയ്തത്

രോഗമുക്തരായവർ

1. ഡൽഹിയിൽനിന്ന് എത്തി 20ന് രോഗം സ്ഥിരീകരിച്ച വയനാട് സ്വദേശിനി (24)

2. കുവൈറ്റിൽനിന്ന് എത്തി 20ന് രോഗം സ്ഥിരീകരിച്ച മാന്തുരുത്തി സ്വദേശി (36)

3. മുംബയിൽനിന്ന് എത്തി 20ന് രോഗം സ്ഥിരീകരിച്ച മണിമല സ്വദേശിനി (25)

4. മുംബയിൽനിന്നെത്തി 20ന് രോഗം സ്ഥിരീകരിച്ച കറുകച്ചാൽ സ്വദേശി (25)

5. കുവൈറ്റിൽനിന്ന് എത്തി 21ന് രോഗം സ്ഥിരീകരിച്ച കൂട്ടിക്കൽ സ്വദേശി (65)

6. മസ്‌കറ്റിൽനിന്ന് എത്തി 22ന് രോഗം സ്ഥിരീകരിച്ച ചങ്ങനാശേരി ചീരഞ്ചിറ സ്വദേശിനി(59)