കോട്ടയം : തലയിൽ ആഴത്തിൽ മുറിവേറ്റ് നായ ചത്തത് വെടിയേറ്റെന്ന പരാതിയുമായി ഉടമ രംഗത്ത്. ഉടമയുടെ പരാതിയിൽ കേസെടുത്തു. നായയുടെ മൃതദേഹം ഇന്ന് കോടിമത മൃഗാശുപത്രിയിൽ പോസ്റ്റ്‌മോർട്ടം ചെയ്യും.

ഞായറാഴ്‌ച രാവിലെ പത്തരയോടെയാണ് കീഴുക്കുന്ന് ഭാഗത്തെ യുവാവിന്റെ വീട്ടുമുറ്റത്ത് നായയെ ചത്തനിലയിൽ കണ്ടെത്തിയത്. കണ്ണിന് മുകളിൽ ആഴത്തിൽ മുറിവേറ്റിരുന്നു. ഈസ്റ്റ് എസ്.ഐ രഞ്ജിത്ത് വിശ്വനാഥൻ നടത്തിയ പരിശോധനയിൽ നായയുടെ തലയിൽ ഈച്ച കുത്തിയുണ്ടായ മുറിവാണ് മരണ കാരണമെന്ന് പറഞ്ഞു. എന്നാൽ വെടിയേറ്റാണ് നായ മരിച്ചതെന്നാണ് ഉടമയുടെ വാദം. സംഭവത്തിൽ ദുരൂഹതയുണ്ടെന്നാരോപിച്ച് ഉടമയും നായ പ്രേമി സംഘടനകളും പരാതി നൽകി. എന്നാൽ പൊലീസ് നടപടിയെടുക്കാനോ, കേസെടുക്കാനോ തയ്യാറായില്ലെന്ന് ഇവർ ആരോപിച്ചു. പോസ്റ്റ്‌മോർട്ടം നടത്തണമെന്നാവശ്യപ്പെട്ട് ഉടമ പൊലീസിനെയും, മൃഗാശുപത്രി അധികൃതരെയും സമീപിച്ചു. എന്നാൽ, പൊലീസിന്റെ സാന്നിധ്യത്തിൽ മാത്രമേ നായയുടെ പോസ്റ്റ്‌മോർട്ടം നടത്താനാവൂ എന്ന നിലപാടാണ് മൃഗാശുപത്രി അധികൃതർ സ്വീകരിച്ചത്. ഒടുവിൽ നായ പ്രേമികൾ കേന്ദ്രമന്ത്രി മേനക ഗാന്ധിയ്‌ക്ക് പരാതി നൽകി. മന്ത്രിയുടെ ഓഫീസ് ഇടപെട്ടതോടെയാണ് ഇന്നലെ വൈകിട്ട് കേസെടുത്തത്. പൊലീസ് അനുമതി ലഭിച്ച ശേഷം ഇന്ന് രാവിലെ മൃതദേഹം പോസ്റ്റ്‌മോർട്ടം ചെയ്യും.