ചങ്ങനാശേരി : വാഴൂർ റോഡിൽ കുരിശുംമൂട് ജംഗ്ഷനിൽ പൈപ്പ് പൊട്ടി ശുദ്ധജലം പാഴാകുന്നു. ജലവിതരണത്തിനായി ഈ ഭാഗത്തേക്കുള്ള പൈപ്പ് തുറക്കുമ്പോഴാണ് പൈപ്പ് പൊട്ടി വെള്ളം റോഡിലേക്ക് ഒഴുകുന്നത്. ഇത് റോഡ് തകരുന്നതിനും ഇടയാക്കുന്നു. വർഷങ്ങൾ പഴക്കമുള്ള പൈപ്പ് മാറ്റിസ്ഥാപിക്കാത്തതാണ് പൈപ്പ് പൊട്ടുന്നതെന്നാണ് വാട്ടർഅതോറിറ്റി ഉദ്യോഗസ്ഥർ പറയുന്നത്. തിരുവല്ലയിൽ നിന്ന് ചങ്ങനാശേരിയിലെത്തിക്കുന്ന ശുദ്ധജലം എത്തിക്കുന്ന പൈപ്പാണിത്. പാറേൽപ്പള്ളി, ചെത്തിപ്പുഴ, ആറ്റുവാക്കേരി ഭാഗങ്ങളിലും പൈപ്പ് പൊട്ടി ജലം നഷ്ടപ്പെടുന്നുണ്ട്. ചങ്ങനാശേരി - വാഴൂർ റോഡ് നവീകരണം നടപ്പാക്കുമ്പോൾ കുരിശുംമൂടുവരെയുള്ള ഭാഗത്തെ ജലവിതരണ പൈപ്പുകൾ മാറ്റി സ്ഥാപിക്കണമെന്ന ആവശ്യം ശക്തമാകുകയാണ്.