കോട്ടയം : ജില്ലയിൽ ഇന്നലെ കൊവിഡ് സ്ഥിരീകരിച്ച 25 പേരിൽ 22 ഉം സമ്പർക്കത്തിലൂടെ രോഗം ബാധിച്ചവർ. സമ്പർക്കം മുഖേന രോഗബാധിതരായവരിൽ 15 പേരും പാറത്തോട് പഞ്ചായത്തിൽ നിന്നുള്ളവരാണ്. രണ്ടുപേർ വിദേശത്തുനിന്നും ഒരാൾ ബംഗളൂരുവിൽ നിന്നും എത്തിയതാണ്. നേരത്തെ രോഗം സ്ഥിരീകരിച്ച് ചികിത്സയിൽ കഴിയുന്നതിനിടെ മരിച്ച പാറത്തോട് സ്വദേശിയുടെ സമ്പർക്കപ്പട്ടികയിൽ ഉൾപ്പെട്ട എട്ടാം വാർഡിൽ താമസിക്കുന്ന 12 പേരും ഏഴാം വാർഡിൽനിന്നുള്ള രണ്ടുപേരും ഒൻപതാം വാർഡിൽ നിന്നുള്ള ഒരാളും രോഗബാധിതരിൽ ഉൾപ്പെടുന്നു.

പാറത്തോട് സ്വദേശിയുടെ സമ്പർക്ക പട്ടികയിലുള്ള വാഴൂർ സ്വദേശി(19), സ്വകാര്യ ആശുപത്രി ജീവനക്കാരിയായ എരുമേലി സ്വദേശിനി (35), കുമരകം സ്വദേശിയായ 48കാരൻ, എഴുമാന്തുരുത്ത് സ്വദേശിയായ മൂന്നു വയസുകാരി, വെച്ചൂർ സ്വദേശിനിയുടെ മകൾ (12), രോഗബാധിതയായി ചികിത്സയിൽ കഴിയുന്ന എഴുമാന്തുരുത്ത് സ്വദേശിനിയുമായി സമ്പർക്കം പുലർത്തിയ 75കാരി, നേരത്തെ രോഗം സ്ഥിരീകരിച്ച പൈക സ്വദേശിയുടെ സമ്പർക്ക പട്ടികയിലുണ്ടായിരുന്ന കാഞ്ഞിരപ്പള്ളി സ്വദേശിക്കും (28) രോഗം സ്ഥിരീകരിച്ചു.

ഖത്തറിൽ നിന്ന് ജൂൺ 28 ന് എത്തി ഹോം ക്വാറന്റൈനിൽ കഴിഞ്ഞിരുന്ന തൃക്കൊടിത്താനം സ്വദേശി (46), ബംഗളൂരുവിൽ നിന്ന് ജൂലായ് 1 ന് എത്തിയ മുണ്ടക്കയം സ്വദേശിയായ ആൺകുട്ടി(14), ദുബായിൽ നിന്ന് ജൂലായ് 1 ന് എത്തിയ പൂവക്കുളം സ്വദേശി (30) എന്നിവരാണ് രോഗം സ്ഥിരീകരിച്ച മറ്റുള്ളവർ.

9 പേർക്ക് രോഗമുക്തി
കൊവിഡ് ബാധിച്ച് ചികിത്സയിലായിരുന്ന 9 പേർക്ക് രോഗം ഭേദമായി. ജൂൺ 19 ന് രോഗം സ്ഥിരീകരിച്ച മാടപ്പള്ളി സ്വദേശി(50), ജൂൺ 22ന് രോഗം സ്ഥിരീകരിച്ച രാമപുരം സ്വദേശിനി(53), ജൂൺ 24ന് രോഗം സ്ഥിരീകരിച്ച പള്ളിക്കത്തോട് സ്വദേശി(70), ജൂൺ 26 ന് രോഗം സ്ഥിരീകരിച്ച കുറിച്ചി സ്വദേശി(23), പള്ളിക്കത്തോട് സ്വദേശി(32), ജൂലൈ രണ്ടിന് രോഗം സ്ഥിരീകരിച്ച കൂരോപ്പട സ്വദേശി(60), വാഴൂർ സ്വദേശി(31), കോട്ടയം സ്വദേശി(48), ജൂലൈ മൂന്നിന് രോഗം സ്ഥിരീകരിച്ച കങ്ങഴ സ്വദേശി(39) എന്നിവരാണ് രോഗമുക്തരായത്. ഇതിനു പുറമെ പത്തനംതിട്ട, ഇടുക്കി ജില്ലകളിൽ നിന്നുള്ള നാലു പേരും കോട്ടയം ജില്ലയിലെ ചികിത്സാ കേന്ദ്രങ്ങളിൽനിന്ന് രോഗമുക്തരായി വീടുകളിലേക്ക് മടങ്ങി.